Toshkent shahrining markaziy ko‘chalarida 4-aprel kunidan 9-aprel kuniga qadar yuk transport vositalarining harakati to‘liq cheklanadi. Bu haqda YHXB xabar berdi.

Keltirilishicha, 2025 yil 4-aprel kunidan 9-aprel kuniga qadar poytaxt Toshkent shahrida Parlamentlararo ittifoqining 150-yubiley assambleyasi tadbirlari o‘tkazilishi rejalashtirilgan.
Shu vaqt ichida poytaxtning markaziy ko‘chalarida yuk transport vositalarining harakati to‘liq cheklanishi sababli, qurilish obyektlarida og‘ir va yengil vaznli barcha toifadagi yuk tashuvchi transport haydovchilari faqat Toshkent halqa avtomobil yo‘lidan harakatlanishlari mumkin.
Vaqtinchalik noqulayliklar uchun uzr so‘raymiz va haydovchilarga o‘z yo‘llarini oldindan rejalashtirishlarini tavsiya qilamiz, deyiladi xabarda.
Toshkent shahrining Mirzo Ulug‘bek tumanidagi O‘zbekiston ovozi ko‘chasi 7/24 ko‘chaga aylanmoqda. Shu munosabat bilan 27-mart kuni soat 7:00 dan 30-aprelgacha O‘zbekiston ovozi ko‘chasining Shastri ko‘chasi bilan kesishmasidan Yahyo G‘ulomov ko‘chasiga qadar qismi vaqtincha avtomashinalar harakati uchun yopilishi aytilgandi.
Shuningdek, qurilish-ta’mirlash ishlari olib borilishi munosabati bilan Olmazor tumanidagi Qorasaroy ko‘chasida transport vositalari harakati vaqtincha to‘xtatiladi. Yopiladigan qism: Abdulla Qodiriy ko‘chasi bilan kesishgan joydan Nurafshon ko‘chasi bilan kesishgan joygacha.
Ishlarni bajarish muddati: 2025-yil 2-apreldan sentyabr oyigacha.
Izoh (0)