Xalqaro eshkak eshish federatsiyasi (World Rowing) Avstraliyaning Kvinslend shtatidagi timsohlar makon qilgan Fitsroy daryosini 2032-yilgi Olimpiya o‘yinlari davomida musobaqalar o‘tkazishga yaroqsiz deb e’lon qildi.
Fitsroy daryosi Olimpiya va Paralimpiya o‘yinlarida eshkak eshish musobaqalarini o‘tkazish uchun shtat hukumati tomonidan tavsiya etilgandi.
Fitsroy daryosi mashg‘ulotlar uchun mos bo‘lsa-da, u milliy yoki xalqaro darajadagi musobaqalarni o‘tkazish imkoniyatini tasdiqlovchi hech qanday texnik asoslashdan o‘tmagan. Tarqalgan xabarlarga zid ravishda, bu yerda kattalar o‘rtasida milliy chempionatlar yoki Avstraliya akademik eshkak eshish chempionatlari o‘tkazilmagan, deyiladi World Rowing bayonotida.
Ta’kidlash joizki, 2032-yilgi yozgi Olimpiya o‘yinlari Brisben shahri va uning atrofidagi Janubi-Sharqiy Kvinslend mintaqasida bo‘lib o‘tadi. Brisben Olimpiya o‘yinlarini qabul qiladigan Avstraliyaning uchinchi shahri bo‘ladi. Ilgari bunday nufuzli musobaqa Melburn (1956) va Sidneyda (2000) shaharlarida o‘tkazilgan edi.
Izoh (0)