“Matritsa” premyerasi bo‘lganiga 25 yil bo‘ldi. Mazkur kult film qayta-qayta ko‘rilsa-da, ba’zi jumboqlar yechilmay qolgandek tuyuladi. Ulardan biri quyoshdan himoyalovchi ko‘zoynaklar bilan bog‘liq.
“Matritsa”ning qaysi qahramonlari qora ko‘zoynak taqqan?
Matritsa haqidagi haqiqatni biladigan deyarli barcha qahramonlar — Triniti, Morfeus, agent Smit, Neo ham qora ko‘zoynakda namoyon bo‘ladi. Biroq boshqa tomondan, bunday aksessuarsiz bemalol yuradigan personajlar ham bor. Masalan, arxitektor yoki bashoratchi ayol.
Matritsa olamida har bir personaj o‘ziga xos qiyofa yaratishi mumkin, ammo negadir ularning barchasi qora ko‘zoynak taqadi. Vaholanki, bu aksessuar hech qanday qo‘shimcha kuch bermaydi va jang qilish qobiliyatlarini oshirmaydi. Shunday bo‘lsa-da, uning o‘ziga xos ma’nosi bor.
Bir talqinga ko‘ra, ko‘zoynak haqiqat ramziga aylanib, tomoshabinlarga qaysi qahramonlar hali ham sarob dunyosida yashayotganini ko‘rsatadi. Ayniqsa, Neo qizil va ko‘k tabletkadan birini tanlashi kerak bo‘lgan kadr juda ta’sirchan ko‘rinadi. Tabletkalarnning aksi Morfeus ko‘zoynagi linzalarida aniq ko‘rinadi.
Bundan tashqari, bu aksessuar raqamli olam va haqiqiy dunyo o‘rtasidagi farqni ta’kidlaydi. “Matritsa”da qahramonlar juda zamonaviy uslubda — qora ko‘zoynakdan tortib charm plashgacha kiyinadi. Har bir detal ularning qiyofasini hissiz va mexanik qilib ko‘rsatadi. Aksincha, oddiy dunyoda ular oddiy va sodda kiyim kiyishadi.
Qora ko‘zoynak taqmaydigan arxitektor va bashoratchi ayolga kelsak, bu ularning o‘z tushunchalarida Neo yoki Morfeusdan ancha ilgarilab ketganliklariga ishora bo‘lishi mumkin. Ehtimol, ular Matritsa tizimining butun tuzilishini mukammal bilar.
Izoh (0)