O‘zbekiston bilan Tojikiston o‘rtasida Ittifoqchilik munosabatlari to‘g‘risidagi shartnoma kuchga kirdi. Bu haqda Prezident matbuot xizmati xabar berdi.
Shavkat Mirziyoyev Xo‘jand shahriga kelgach, Tojikiston prezidenti Emomali Rahmon bilan uchrashuv o‘tkazdi. Muzokaralar yakunida Shavkat Mirziyoyev va Emomali Rahmon huzurida tashqi siyosat idoralari rahbarlari O‘zbekiston bilan Tojikiston o‘rtasida Ittifoqchilik munosabatlari to‘g‘risidagi shartnomaning kuchga kirishi haqidagi bayonnomani imzoladi va ratifikatsiya yorliqlarini almashdi.
Shartnoma o‘tgan yili 18-aprel kuni Dushanbe shahrida bo‘lib o‘tgan oliy darajadagi ikki tomonlama sammitda imzolangan edi.
Hujjat ratifikatsiya yorliqlari almashilgan kundan e’tiboran kuchga kiradi.
Bugun, 31-mart kuni Shavkat Mirziyoyev amaliy tashrif bilan Xo‘jand shahriga yetib bordi. Aeroportda davlat rahbarini Tojikiston Respublikasi prezidenti Emomali Rahmon kutib oldi. O‘zbekiston rahbarining tashrifi sharafiga davlat bayroqlari ko‘tarildi. Milliy kuy-qo‘shiq va raqslar ijro etildi.
Bugun, shuningdek, O‘zbekiston, Tojikiston va Qirg‘iziston prezidentlarining uch tomonlama uchrashuvi bo‘lib o‘tadi.
Muzokaralar yakunida O‘zbekiston, Tojikiston va Qirg‘iziston davlat chegaralarining tutash nuqtasi to‘g‘risidagi shartnomani imzolash rejalashtirilgan.
Izoh (1)
Bu juda yaxshi yangilik. Tahlilchilar bu ittifoqchilikni Markaziy Osiyoda tinchlik va xavfsizlikni ta’minlashning konstruktiv asosi sifatida baholaydi. Shartnoma O‘zbekiston va Tojikistonning strategik sherikligini yanada mustahkamlashga xizmat qiladi.