Turk prodyuserlari va menejerlari nega his-tuyg‘ulardan daromad olishni shunchalik yoqtirishadi? “Qo‘rg‘on sirlari” serialidagi Afra Sarachog‘lu va Mert Ramazon Demir hamda “Qalbim eshigini qoq” seriali yulduzlari Kerem Bursin va Hande Erchel munosabatlari uyushtirilganmidi?
1. Sevgi shov-shuvli piarlardan ko‘ra ancha yaxshi ta’sir qiladi (turklar buni yaxshi bilishadi)
Bosh qahramonlar asta-sekin bir-biriga ko‘ngil qo‘yadigan serialni tomosha qilayotganingizda, ikkala aktyorning yo baxtli oila qurganini, yo kim bilandir munosabatda ekanini, yoki bir-biriga nisbatan hech qanday tuyg‘u sezmasligini bilasiz. Ammo to‘qib chiqarilgan hikoyada nafaqat personajlarni, balki o‘z hissiyotlarini suratga olish maydonchasi tashqarisida boshdan kechirayotgan haqiqiy insonlarni ko‘rish butunlay boshqa masala.
Bunday usul nafaqat menejerlar va prodyuserlarga tomoshabinlarda serialdagi voqealar haqiqatga yaqin ekani haqida taassurot uyg‘otishga yordam beradi, balki tomoshabinlar har bir qismni diqqat bilan kuzata boshlaydilar (hatto qayta-qayta tomosha qilishlari mumkin). Ular yulduzlar qayerda rol o‘ynagani va qayerda haqiqiy sevgini boshdan kechirayotganini ko‘rish umidida bo‘ladilar.
Aytgancha, Turkiyada piar-romanlar faqatgina biror film yoki serialga e’tibor tortish uchun qo‘llanilmaydi. Bunga Serenay Sarikaya va Mert Demir orasidagi, hamon ko‘plab savollarga sabab bo‘layotgan voqea ajoyib misol bo‘la oladi.
Musiqachi mashhur turk aktrisasi bilan munosabatidan so‘ng ancha tanildi. Serenayning yigit bilan pul evaziga uchrashayotgani haqidagi shov-shuvlar va janjal esa unga bo‘lgan qiziqishni yanada oshirdi.
Turk seriallari o‘zining romantik komediyalari bilan shuhrat qozongani tufayli bu his-tuyg‘u harakatlantiruvchi kuchga aylandi. Chunki ekranda ko‘rsatiladigan bir ko‘rishdayoq sevgi haqidagi ertaknamo hikoyalar bilan ulg‘aygan tomoshabinlar bunday holat haqiqiy hayotda ham sodir bo‘lishi mumkinligiga chin dildan va juda soddalik bilan ishonishadi.
Afsuski, “Sevgi iztirobi” seriali ijodkorlari buning uddasidan chiqa olmadi, chunki Fahriye Evjen suratga olish jarayonida haqiqiy to‘polon uyushtirdi. Bu voqea turk ommaviy axborot vositalarida Burak O‘zchivit bilan Neslihan Atagul o‘rtasida paydo bo‘layotgan his-tuyg‘ular haqida yozishni boshlaganlaridan so‘ng yuz berdi.
2. Piar-romanlar e’tiborni noxush hodisalardan chalg‘itishga yordam beradi
Bu “Qo‘rg‘on sirlari” serialining uchinchi mavsumi reytinglari tez sur’atda pasayishni boshlagan paytda yaqqol ko‘rindi. O‘sha paytda Mert Ramazon Demir va Afra Sarachog‘luning ajralishi haqida xabarlar tarqaldi. Muxlislar e’tiborini sevimli aktyorlariga qaratishdi va serialni yanada sinchkovlik bilan tomosha qila boshlashdi.
Xuddi shunday holat “Qalbim eshigini qoq” qahramonlari Kerem Bursin va Hande Erchel munosabatlarida ham kuzatildi. Ikkinchi mavsum reytingda pastlay boshlagach, serial ijodkorlari ular o‘rtasida nimadir borligiga shama qilib, yulduzlarning ta’tildagi suratlarini e’lon qilishdi.
Bunday yondashuv tufayli ikkinchi mavsum ham o‘zini oqladi va ko‘plab mamlakatlarga sotildi. Biroq serial tugashi bilan deyarli barcha turk ommaviy axborot vositalari sevimli qahramonlarning ajralishi haqida yozishni boshladi.
3. Piar-munosabatlar vositasida menejerlar “qo‘l ostidagilar”ga yangi qiyofalar yaratib beradilar
Agar aktyor yoki aktrisa odatiy obraziga “yopishib qolsa”, bunday paytda ham piar-roman qo‘l keladi. Turkiyada bunday holat tez-tez uchraydi, Kerem Bursinning qanchalik uzoq vaqt Serkan Bolat bo‘lib qolganini eslang. Aytgancha, ko‘pchilik uchun u hamon faqat shu obrazdagi erkak bo‘lib qolmoqda.
Ammo u “Agar qattiq sevsang” serialida Hafsanur Sanjaktutan bilan ishlashni boshlagan paytda va internetda juda ham samimiy kadr ortidagi rasmlar paydo bo‘la boshlaganda, u nihoyat Atesh Arjali bo‘lib tanildi.
Albatta, hozirda hammaning Xande Erchel va Hakan Sabanji o‘rtasidagi munosabatlar haqiqat ekanligiga ishonchi komil, biroq dastlab, qiz Turkiyaning eng mashhur milliarderi bilan munosabat o‘rnatishni boshlaganida, unga keladigan reklama takliflari soni sezilarli darajada ko‘paydi.
Aytgancha, Jan Yamanning Demet O‘zdemir bilan sevgi munosabatlari haqidagi mish-mishlar o‘z vaqtida uning obro‘sini tiklashga yordam bergan. Chunki 2015-yildan 2017-yilgacha turk matbuoti e’tiborini aktyorga qaratgan edi. Bunga sabab uning “Bizdan kim sevmagan?” serialidagi hamkasbi Selin Soyderga nisbatan aytgan nojo‘ya so‘zlari edi. Obro‘ga putur yetkazuvchi bu mojaroning tinchimaydigandek tuyulishiga qaramay, 2018-yilda “To‘rg‘ay” seriali efirga chiqdi. Serial ustida ishlash jarayonida Jan Demetga chindan ham ko‘ngil qo‘ydi.
Aktyor doimo hamkasbining energiyasini maqtab, uning iste’dodini ta’kidlab turardi. Biroz vaqt o‘tgach, ularning uchrashib yurganlari haqida mish-mishlar tarqaldi. Ba’zilar bu shunchaki piar emas, balki haqiqiy his-tuyg‘ular ekanligiga ishondi. Biroq serial yakuniga yetishi bilan bu sevgi tarixi ham tugadi. Shunday bo‘lsa-da, Jan Yaman ketma-ket kelgan mojarolardan so‘ng o‘z mavqeyini tiklashga erishdi, Demet O‘zdemir esa yanada mashhur bo‘ldi.
Izoh (0)