Namangan viloyati Yangiqo‘rg‘on tumanida 4 yoshli bola yong‘in oqibatida halok bo‘ldi. Bu haqda Milliy telekanalining “Millar” dasturida xabar berildi.
Qayd etilishicha, yong‘in 23-mart kuni 3 nafar qarindosh bola yerto‘laga tushib, o‘tin va xashaklarni yoqishi oqibatida yuz bergan. Yong‘in ichida qolgan bolalarning 2 nafari 2021-yilda, yana biri 2017-yilda tug‘ilgan.
Rasmiy ma’lumotlarga ko‘ra, ikki nafar bola deraza orqali qutqarib qolingan. Vafot etgan bolaning murdasi esa bobosi tomonidan topilgan.
Shifokorlarning yordami sababli ikki bolaning hayoti saqlab qolingan. Tuman tibbiyot birlashmasining xulosasiga ko‘ra, tirik qolgan bolalar yuz, bo‘yin, ikkala qo‘l, oyoq va son qismlaridan kuyish jarohatini olgan.
Marhumning vafotiga tananing 100 foiz qismi 4-darajadagi kuyish oqibatida yuzaga kelgani, tana qismlarida to‘liq kuyish jarohati borligi ko‘rsatilgan.
Bosh prokuratura matbuot kotibi Hayot Shamsutdinovning bildirishicha, mazkur holat yuzasidan marhum bolaning o‘lim sabablarini aniqlash maqsadida sud-tibbiy ekspertizasi, uning xonadonida sodir bo‘lgan yong‘in sababini aniqlash uchun yong‘in texnikaviy ekspertizasi tayinlanib, tergovga qadar tekshiruv harakatlari olib borilmoqda.
2025-yilning yanvarida Toshkentdagi ko‘p qavatli uylarning biridagi xonadonda gaz portlashi oqibatida bir bola vafot etgandi.
Izoh (0)