Toshkent viloyatining Yangiyo‘l tumanidagi xonadonda gaz portladi. Bu haqda tuman hokimligi matbuot xizmati xabar berdi.
27-mart kuni soat 21:50 larda Yangiyo‘l tuman Markaziy shifoxonasi shifokori L.G‘ulomovaning xabariga ko‘ra, 55 yoshli B.A va uning 46 yoshli turmush o‘rtog‘i O‘.A. tanasi 60 foiz kuyishi tashxisi bilan kelgan.
Olib borilgan tezkor surishtiruv ishlari natijasida tumanning “Gulbahor” mahallasidagi uyning 2-qavatida joylashgan xonadonda to‘planib qolgan tabiiy gaz chaqnashi natijasida portlash sodir bo‘lgani aniqlangan. Ijtimoiy tarmoqlarda tarqalgan videoda hodisa oqibatida yong‘in kelib chiqqanini ko‘rish mumkin.
Chaqnash natijasida 5 qavatli uyning 3 ta qavat oynalari singan. Ushbu ko‘p qavatli uy to‘liq bitkazilib topshirilmagani sababli bu yerda fuqarolar yashamasligi aniqlandi.
Yangiyo‘l tumani hokimligining “Daryo” so‘roviga ko‘ra aniqlik kiritishicha, er-xotin hali foydalanishga topshirilmagan xonadonda olib borayotgan ta’mirlash ishlarini ko‘zdan kechirish uchun kirib, “svet”ni yoqqanida portlash yuz bergan.
2025-yilning fevralida Buxoro viloyatining G‘ijduvon tumanidagi uyda gaz portlagandi. Hodisa oqibatida uyning bir qismi qulab tushgan.
Izoh (0)