O‘zbekistonda elektr energiyasi va tabiiy gaz uchun yangi tariflar 1-apreldan emas, 1-maydan kuchga kiradi. Bu haqda “Daryo”ga bosh vazir matbuot kotibi Behzod Hidoyatov ma’lum qildi.
Uning bildirishicha, bunday qaror prezident topshirig‘iga ko‘ra aholi va tadbirkorlarni qo‘llab-quvvatlash maqsadida qabul qilindi.
2025-yil apreldan boshlab elektr energiyasi va tabiiy gaz uchun yangi tariflar oshirilishi Vazirlar Mahkamasining 2024-yil 16-apreldagi “Yoqilg‘i-energetika sohasida bozor mexanizmlarini joriy etishning qo‘shimcha chora-tadbirlari to‘g‘risida”gi qarori bilan belgilangandi. Endilikda hukumatning ushbu qaroriga o‘zgartirish kiritiladi.
Narxlar qanday o‘zgarishi belgilangandi?
Vazirlar Mahkamasi qarorida 2025-yil apreldan boshlab elektr energiyasi isteʼmolchilarning III guruhi, shu jumladan, ovqat tayyorlash uchun markazlashgan holda elektr plitalari bilan jihozlangan ko‘p qavatli uy-joylar va yotoqxonalarda yashovchi maishiy isteʼmolchilar uchun bir oydagi isteʼmoldan kelib chiqib:
- oyiga 200 kVt/soatgacha – 300 so‘m;
- oyiga 201 kVt/soatdan 1 000 kVt/soatgacha – 500 so‘m;
- oyiga 1 001 kVt/soatdan 5 000 kVt/soatgacha – 750 so‘m;
- oyiga 5 001 kVt/soatdan 10 000 kVt/soatgacha – 875 so‘m;
- oyiga 10 000 kVt/soat va undan yuqori – 1 000 so‘mdan etib belgilangandi.
Isteʼmolchilarning I guruhiga kiruvchi qismi o‘zgarishsiz – 1 kVt/soat uchun 1 000 so‘m etib belgilangandi. II guruh isteʼmolchilar uchun ham bir kilovatt soat elektr energiyasi 1000 so‘mdan yetkazib berilishi belgilangandi. Isteʼmolchilarning IV guruhi ham shu sanadan eʼtiboran bir kVt/soat elektr energiyasi uchun 1 000 so‘mdan to‘lashi ko‘zda tutilgandi.
Qolgan maishiy isteʼmolchilar uchun esa bir oydagi isteʼmoldan kelib chiqib quyidagicha belgilangandi:
- oyiga 200 kVt/soatgacha – 600 so‘m;
- oyiga 201 kVt/soatdan 1 000 kVt/soatgacha – 1 000 so‘m;
- oyiga 1 001 kVt/soatdan 5 000 kVt/soatgacha – 1 500 so‘m;
- oyiga 5 001 kVt/soatdan 10 000 kVt/soatgacha – 1 750 so‘m;
- oyiga 10 000 kVt/soat va undan yuqori – 2 000 so‘m.
Aholining kommunal-maishiy ehtiyojlar uchun isteʼmol qiladigan tabiiy gazi uchun narxlar quyidagicha o‘zgarishi ko‘zda tutilgandi:
- oyiga 500 kub metrgacha – 1 000 so‘m;
- oyiga 501 kub metrdan 2 500 kub metrgacha – 1 800 so‘m;
- oyiga 2 501 kub metrdan 5 000 kub metrgacha – 2 100 so‘m;
- oyiga 5 001 kub metrdan 10 000 kub metrgacha – 2 500 so‘m;
- oyiga 10 001 kub metr va undan yuqori miqdorda tabiiy gaz isteʼmol qiladiganlar bir kub metr uchun 3 000 so‘m.
Avtomobillarga gaz to‘ldirish kompressor shoxobchalari uchun bir kub metr tabiiy gaz 2 500 so‘mdan yetkazib berilishi belgilangan bo‘lsa, issiqlik elektr stansiyalari va issiqlik elektr markazlari buning uchun 1 800 so‘mdan to‘lashi ko‘zda tutilgandi.
Aholiga maishiy ehtiyojlar uchun sotiladigan suyultirilgan gazning bir kilogrammi uchun to‘lov 2 000 so‘m bo‘ladi.
Markaziy bank raisi Timur Ishmetovga ko‘ra, energiya va yonilg‘i narxlari o‘sishi inflyatsiya oshishiga 1,8–1,9 foiz atrofida birlamchi taʼsir qilishi kutilmoqda.
Izoh (0)