Qozog‘iston terma jamoasi kuzda prinsipial raqiblardan biri bilan o‘rtoqlik uchrashuvi o‘tkazishi mumkin. Bu haqda Vesti.kz nashri o‘z manbalariga tayanib xabar berdi.
Ma’lum qilinishicha, Qozog‘iston futbol federatsiyasi (QFF) O‘zbekiston terma jamoasi bilan o‘rtoqlik o‘yini tashkil etish bo‘yicha muzokara olib bormoqda.
Uchrashuv FIFA kunlari doirasida, noyabr oyida o‘tkazilishi kutilmoqda. 15-noyabr kuni Qozog‘iston terma jamoasi JCH-2026 saralash bosqichidagi so‘nggi o‘yinini Belgiyaga qarshi o‘tkazadi. Shundan so‘ng jamoa uchun bo‘sh kun paydo bo‘ladi. O‘zbekiston esa saralash doirasidagi oxirgi o‘yinini 10-iyun kuni Qatarga qarshi o‘tkazadi.
Qozog‘iston va O‘zbekiston terma jamoalari oxirgi marta 2022-yil 16-noyabr kuni Toshkentda o‘zaro bahs olib borgan edi. O‘shanda O‘zbekiston 2:0 hisobida g‘alaba qozongan.
Ta’kidlash joiz, O‘zbekiston terma jamoasi tarixda ilk bor jahon chempionatining final bosqichiga chiqishga juda yaqin turibdi. Jamoa 17 ochko bilan saralash guruhining ikkinchi pog‘onasida bormoqda. Yana bir ochko Temur Kapadze jamoasiga mundial yo‘llanmasini kafolatlaydi. O‘zbekiston saralash bosqichi yakuniga qadar yana ikkita uchrashuv o‘tkazadi: 5-iyun kuni safarda BAAga qarshi, 10-iyun kuni esa o‘z maydonida Qatarga qarshi.
Eslatib o‘tamiz, Qozog‘iston terma jamoasi bosh murabbiyi vazifasini bajaruvchi Ali Aliyev jamoasi Osiyo futbol konfederatsiyasiga a’zo bo‘lganida, O‘zbekiston kabi jahon chempionati yo‘llanmasini qo‘lga kiritishi mumkinligini ta’kidlagan edi.
Izoh (0)