Jahon banki havoning ifloslanishi yiliga taxminan 5,7 million kishining bevaqt o‘limiga sabab bo‘layotganini ma’lum qildi. Ushbu o‘limlarning 95 foizi past va o‘rta daromadli mamlakatlarda kuzatiladi.
Hisobotda qayd etilishicha, agar qat’iy choralar ko‘rilsa, bu ko‘rsatkichlarni sezilarli darajada kamaytirish mumkin. Jahon banki ekspertlari havo ifloslanishining global iqtisodiyotga yetkazayotgan zarari jahon yalpi ichki mahsulotining qariyb 5 foizini tashkil etishini aytdi. Bu zarar sog‘liqning yomonlashuvi, mehnat unumdorligining pasayishi va umr ko‘rish davomiyligining qisqarishi bilan bog‘liq.
Jahon bankining atrof-muhit bo‘yicha global direktori vazifasini bajaruvchi Jeneveva Konnorsning so‘zlariga ko‘ra, juda ko‘p odamlar, ayniqsa, past va o‘rta daromadli mamlakatlarda yashovchilar ifloslangan havodan nafas oladi.
Shoshilinch choralar ko‘rish zarur, va bizning yangi hisobotimiz bu borada imkoniyatlar mavjudligini ko‘rsatadi, dedi u.
Konnors hisobot uchta asosiy jihatga: boshqaruvni yaxshilash, ma’lumotlar sifatini oshirish va davlat investitsiyalaridan tashqari xususiy investitsiyalarni jalb qilishga e’tibor qaratishini aytdi.
Ham mamlakatlar ichida, ham ular o‘rtasida hamkorlikni kengaytirish muhim, deya qo‘shimcha qildi u.
Siyosatdagi o‘zgarishlar odamlarni yuqori darajadagi PM2.5 zarrachalarining salbiy ta’siridan himoya qilishga yordam berishi mumkinligi ta’kidlanadi. PM2.5 — bu o‘lchami 2,5 mikrometr va undan kichik bo‘lgan mayda zarrachalardir.
Global miqyosda havoni ifloslantiruvchi asosiy manbalar inson faoliyati bilan bog‘liq. Qishloq xo‘jaligi, shaharsozlik, transport, sanoat, shuningdek, maishiy ovqat tayyorlash va isitish kabi sohalarda amalga oshiriladigan siyosiy o‘zgarishlar havodagi zararli zarrachalar konsentratsiyasini kamaytirishga yordam berishi mumkin. Ba’zi hududlarda esa mayda zarrachalarning muhim manbai cho‘l changlari hisoblanadi.
Izoh (0)