Venetsiya 2150-yilgacha butunlay suv ostida qolishi mumkin. Bu faraz Milliy geofizika va vulkanologiya instituti xalqaro loyihasi doirasida modellashtirilgan ssenariylardan birida ma’lum qilindi.
RAI News 24 telekanalining ma’lum qilishicha, tadqiqotchilarning xulosalariga ko‘ra, “Moisey” to‘siq tizimi shaharni himoya qilish uchun yetarli bo‘lmaydi.
Suv toshqini simulyatsiyasi 2050, 2100 va 2150-yillar uchun amalga oshirildi. Eng yomon ssenariy XXII asrning o‘rtalarida, 139 kv kmdan 226 kv kmgacha maydonni suv bosishi mumkin bo‘lgan paytda sodir bo‘ldi.
“Qo‘shimcha himoya choralarisiz bu suv toshqiniga olib keladi va mahalliy aholiga ham, Venetsiya madaniy merosiga ham katta zarar yetkazadi”, deya ogohlantirmoqda olimlar.
Ular iqlim o‘zgarishi bilan kuchaygan “yuqori suv sathi” ta’siri quruqlik darajasining doimiy pasayishiga va uning dengiz tomonidan so‘rilishiga olib kelishini tushuntirmoqda. Endi bu jarayonning tezligi yiliga 7 mm ga yetadi.
150 dan ortiq orollarda qurilgan Venetsiyaning yo‘q bo‘lib ketishining oldini olish maqsadida suv toshqini paytida lagunani to‘sish uchun maxsus mobil to‘siq tizimi ishlab chiqilgan.
Bir necha yil oldin, qurilishi qimmatligi tufayli ko‘plab bahs-munozaralarga sabab bo‘lgan “Moisey” to‘g‘oni foydalanishga topshirildi va so‘nggi yillarda Venetsiyani “yuqori suv sathi”dan himoya qilmoqda. Oy sikliga bog‘liq bo‘lgan dengiz to‘lqinlari tufayli yuzaga kelgan “yuqori suv sathi” hodisasi Adriatik dengizi lagunasidagi kichik orollarning tabiiy yostig‘ida joylashgan Venetsiyaning orol qismiga xosdir. Ammo suv vaqti-vaqti bilan ko‘tarilib, Avliyo Mark maydonini biroz suv bosadi.
Nemis shoiri Iogann Volfgang Gyote bundan 200-yil oldin Apennin tog‘lari bo‘ylab qilgan sayohatida ukasiga shunday deb yozgan ekan: “Sen tezda Venetsiyaga kelishing kerak, 50-yildan keyin u yo‘q bo‘lib ketadi”.
Izoh (0)