Futbol bo‘yicha Birlashgan Arab Amirligi terma jamoasi bosh murabbiyi Paulo Bento o‘z lavozimidan ozod qilindi. Bu haqida BAA futbol assotsiatsiyasi matbuot xizmati xabar berdi.
Hozircha mutaxassisning nega ishdan olingani ma’lum qilinmagan. “Biz murabbiylar shtabi va uning yordamchilari bilan shartnomani bekor qilganimizni rasman e’lon qilamiz”, deyiladi xabarda.
BAA portugaliyalik murabbiy qo‘l ostidagi so‘ngi o‘yinni 25-mart kuni Shimoliy Koreyaga qarshi o‘tkazdi. Qiyin o‘tgan bahsda Bento shogirdlari 2:1 hisobida g‘alaba qozondi. Amirliklar jamoasi JCH—2026 saralash bosqichi A guruhida 13 ochko bilan 3-o‘rinni egallab turibdi.
55 yoshli Paulo Bento 2023-yil Birlashgan Arab Amirligi terma jamoasi boshqaruviga kelgan edi. Jamoa uning qo‘l ostida 26 ta uchrashuv o‘tkazib, 14 ta g‘alaba, 6 durang va 6 mag‘lubiyat qayd etdi. Murabbiyning shartnomasi 2026-yilga qadar mo‘ljallangan edi.
Ma’lumot uchun, BAA terma jamoasi 2026-yilgi Jahon chempionati saralashi doirasidagi navbatdagi o‘yinini O‘zbekistonga qarshi o‘tkazadi. Uchrashuv 5-iyun kuni bo‘lib o‘tadi.
Izoh (0)