Bugun O‘zbekistondagi masjidlarda Qur’oni karimning xatmonalari bo‘ladi, deb xabar bermoqda Musulmonlar idorasi axborot xizmati.
Qayd etilishicha, bugun, 26-mart kuni Qadr kechasi oqshomida 27 kun davomida 1700 dan ziyod masjidda xushovoz qorilar tomonidan o‘qilgan Qur’oni karimning xatmonalari bo‘lib o‘tadi. Mamlakat bo‘ylab xatmi Qur’onlar o‘qilgan masjidlarda fuqarolar bir vaqtning o‘zida xatmonadan keyingi duolarga qo‘l ochadi.
“Ulamolarning ta’kidlashicha, Qur’on xatm qilinganidan so‘ng qilingan duo rad etilmaydi. Chunki Qur’on Allohning kalomi bo‘lib, uni to‘liq o‘qib tugatish ulug‘ ibodat. Bugun dunyo-yu oxirat saodatiga erishish uchun iltijo qilish fursatidir”, deyiladi xabarda.
Ramazon oyida 1,7 mingta masjidda Qur’oni karim xatm qilinishi aytilgan edi.
Kecha, 25-mart kuni Shavkat Mirziyoyev keng jamoatchilik bilan birgalikda iftorlik marosimida ishtirok etdi. Tadbir avvalida davlat rahbari xalqni va jamiki musulmon ummatini muborak Ramazon oyi bilan yana bir bor tabrikladi.
Mamlakatdagi turli millat va din vakillari o‘rtasida ahillikni kuchaytirish maqsadida shu yil sentyabrda yana bir tadbir — Toshkent va Samarqand shaharlarida “Deklaratsiyalar muloqoti forumi” o‘tkaziladi. Bu xalqaro anjuman turli diniy eʼtiqod vakillari o‘rtasida o‘ziga xos maʼrifiy muloqot maydoni bo‘ladi.
Konstitutsiyaga muvofiq, O‘zbekiston ijtimoiy davlat maqomiga ega bo‘lib, xalqchil va insonparvar siyosat yuritilmoqda. Xususan, o‘tgan yilning o‘zida ko‘makka muhtoj insonlarga 16 trillion so‘mlik moddiy yordam va nafaqalar berilgan. Kam taʼminlangan oilalarga mansub 51 ming nafar bola bog‘chaga joylashtirilgan, ularning 176 ming nafar aʼzosiga tibbiy ko‘mak ko‘rsatilib, 182 ming nafari ijtimoiy xizmatlar bilan qamrab olingan.
Izoh (0)