Kariyes nafaqat og‘riq va noqulaylik tug‘diradi, balki ovqatlanish odatlariga ham ta’sir qilishi mumkin. Ba’zi tadqiqotlar tish muammolari hazm qilish jarayoniga ta’sir qilib, vazn ortishiga sabab bo‘lishi mumkinligini ko‘rsatadi.
“Ozish va orzumdagi tarozi ko‘rsatkichiga erishish uchun qilgan barcha urinishlarim besamar ketdi. Kuni kecha men diyetolog-blogerdan tishlardagi kariyes vazn yo‘qotishga xalaqit berishi haqida eshitib qoldim. Ha, mening tishlarim ideal holatda emas, shunda ularni tuzatmagunimcha, ortiqcha vaznni yo‘qota olmaymanmi?”
Stefaniya, 21 yosh
Stomatolog Olesya Koganova ushbu masalaga oydinlik kiritdi.
Agar kimnidir tish og‘rig‘i bezovta qilsa, u iloji boricha kamroq (kuniga 1-2 mahal) ovqatlanadi, chunki chaynash jarayoni bemorga noqulaylik tug‘diradi. Ba’zi holatlarda bu metabolizmga ta’sir qilib, hazm tizimini buzilishiga sabab bo‘ladi. Natijada uzoq vaqtga och qolgan tana o‘z zaxiralarini saqlab qolish uchun energiyani tejay boshlaydi. Shu sababli kariyesi bor shaxslar odatdagidan kamroq kaloriyalarni yo‘qotadi, bu esa vaznga ta’sir qiladi.
Yoki boshqa sabab: tish og‘riganida, bemor ovqatni yaxshi chaynamay, tez yutadi. Shu sababli to‘yinganlik hissi kechroq kelib, me’yoridan ortiq ovqat iste’mol qilinadi. Ushbu omillarni hisobga olsak, haqiqatan ham kariyes sababli vazn yo‘qotishda muammolarga duch kelish mumkin.
Kariyesga olib boradigan kundalik xatolar
- Noto‘g‘ri tanlangan tish cho‘tkasi;
- Tishlarni tozalashda samarasiz texnikadan foydalanish;
- Mos kelmaydigan tish pastasidan foydalanish, jumladan, tish emalini shikastlaydigan pastalar sotib olish;
- Tish tozalash ipidan nazoratsiz yoki noto‘g‘ri foydalanish (masalan, parodont kasallik bilan og‘rigan bemorlarga ipdan foydalanish tavsiya etilmaydi);
- Milklarni shikastlashgacha olib boradigan haddan tashqari kuchli ishqalash bilan tishlarni tozalash;
- Professional gigiyena uchun parodontologga muntazam tashrif buyurmaslik.
Kariyesga chalinmaslik uchun tish cho‘tkasini qanday tanlash kerak?
- Tish cho‘tkasi tabiiy tolalardan tayyorlanmasligi kerak, aks holda u yerda zararli bakteriyalar to‘planadi;
- Cho‘tka tolalari sun’iy materialdan bo‘lishi, iloji boricha zich va o‘rtancha qattiqlikda bo‘lishi lozim;
Tish pastasi turlari va uni tanlash bo‘yicha tavsiyalar
Reminerallashtiruvchi tish pastasi — tish emalini tiklash va mustahkamlashga yordam beradi. Tarkibida kaltsiy fosfat, gidroksiapatit kabi minerallar mavjud. Tish emali yupqalashgan yoki sezgirligi oshgan kishilar uchun foydali.
Ftorli tish pastasi — kariyesdan himoya qiladi va tish emalini mustahkamlaydi. Tarkibida natriy ftorid, aminofluorid yoki monofluorofosfat bo‘ladi. Profilaktika uchun tavsiya etiladi, ammo ortiqcha ftor iste’mol qilish zararli.
Argininli tish pastasi — tish sezgirligini kamaytiradi va tish emalini tabiiy ravishda mustahkamlaydi. Tarkibida arginin va kaltsiy karbonat mavjud bo‘lib, ular tish yuzasida himoya qatlami hosil qiladi.
Probiotikli tish pastasi — og‘iz bo‘shlig‘idagi zararli bakteriyalarni kamaytirib, foydali mikroflorani saqlashga yordam beradi. Tarkibida laktobakteriyalar va bifidobakteriyalar bo‘lishi mumkin. Og‘iz gigiyenasi bilan bog‘liq muammolari bor kishilar uchun tavsiya etiladi.
Enzimli tish pastasi — tish yuzasidagi qora toshlarni eritib, tabiiy tozalanish jarayonini tezlashtiradi. Tarkibida lizotsim, bromelain, papain kabi fermentlar bo‘ladi.
Izoh (0)