Farg‘ona viloyati Beshariq tumanidagi ariqdan 2 yoshli bola o‘lik holda topildi. Bu haqda Bosh prokuratura “Daryo”ga xabar berdi.
Keltirilishicha, Beshariq tuman prokuraturasiga tuman IIB navbatchilik qismidan 24-mart kuni soat 21:00 da kelib tushgan xabarga ko‘ra, mahalliy ariq ichidan 1-2 yoshlar atrofidagi voyaga yetmagan shaxsi noma’lum o‘g‘il bola murdasi aniqlangan.
Mazkur xabarga asosan mazkur hudud tezkor-tergov guruhi tomonidan krim-texnika vositalari yordamida ko‘zdan kechirilib, barcha protsessual harakatlar amalga oshirildi va hujjatlar rasmiylashtirildi. Dastlabki xulosaga ko‘ra, shaxsi noma’lum murdaning tanasida tan jarohatlari aniqlanmagan — uning o‘limiga nafas yo‘llarini suv bilan berkilishi natijasidagi mexanik asfiksiya sabab bo‘lgani ko‘rsatilgan.
Olib borilgan tezkor qidiruv tadbirlari davomida uning shaxsiga aniqlik kiritishning imkoni bo‘lmagan. Hozirda Beshariq tuman prokuraturasi tomonidan tergovga qadar tekshiruv olib borilmoqda va ijrosi nazoratga olindi.
Toshkentning Chilonzor tumanidan oqib o‘tuvchi Bo‘rijar kanalida 3 kishi cho‘kib ketgani to‘g‘risida xabar berilgandi. Shuningdek, Sirdaryoda o‘quvchilar bo‘lgan Gentra kanalga tushib ketishi oqibatida egizaklar suvda halok bo‘lgan edi.
Izoh (0)