Jahon chempionati saralash bosqichi 8-tur doirasidagi Eron — O‘zbekiston bahsi 25-mart, seshanba kuni bo‘lib o‘tdi. Unda jamoalar 2:2 hisobida durang o‘ynashdi. Bellashuvlardan keyin We Global Football portali milliy jamoalarning Amerika qit’asida bo‘ladigan mundialga yo‘llanma olish imkoniyatlarini baholadi.
Unga ko‘ra, O‘zbekiston milliy jamoasining A guruhidan okean ortidagi Jahon chempionatiga to‘g‘ridan-to‘g‘ri yo‘llanma olish imkoniyati 96 foizga baholanmoqda. Qirg‘izistonga qarshi bahsdan keyin bu raqamlar 92,6 foizni tashkil qilayotgan edi. Tehronda qo‘lga kiritilgan 1 ochkodan keyin jamoaning imkoniyati salkam 4 foizga oshdi.
Temur Kapadze jamoasi Mundial masalasini hal qilishi uchun 1 ochko yetarli. O‘zbekiston 5-iyun kuni safarda Birlashgan Arab Amirliklari jamoasiga qarshi maydonga tushadi. Agar ushbu bahsda durang natijasi qayd etilsa, “oq bo‘rilar” muddatidan avval yo‘llanmani naqd qilishadi. Agar amirliklar maydonida imkoniyat boy berilsa, barcha narsa 10-iyun kuni Toshkentda bo‘ladigan Qatarga qarshi o‘yinda hal bo‘ladi.
Eron 20 ochko bilan musobaqa yo‘llanmasini hal qildi. O‘zbekiston esa 17 ochko bilan 2-o‘rindan joy olgan. Kapadze jamoasining asosiy ta’qibchisi hisoblangan BAA hisobida esa 13 ochko mavjud. Qirg‘iz Respublikasiga 1:3 hisobida imkoniyatni boy bergan Qatar to‘g‘ridan-to‘g‘ri yo‘llanmani qo‘ldan chiqardi.
O‘zbekiston terma jamoasining keyingi uchrashuvlari jadvali:
6-iyun
BAA — O‘zbekiston
10-iyun
O‘zbekiston — Qatar
A guruhi jadvali:
1. Eron — 20 ochko
2. O‘zbekiston — 17 ochko
3. BAA — 13 ochko
4. Qatar — 10 ochko
5. Qirg‘iz Respublikasi — 6 ochko
6. Shimoliy Koreya — 2 ochko
Ma’lumot uchun, Osiyo qit’asidan 2 ta terma jamoa — Yaponiya va Eron 2026-yilgi Jahon chempionati yo‘llanmasiga ega chiqdi.
Izoh (0)