Belarusda rasman yettinchi muddatga prezidentlikka kirishgan Aleksandr Lukashenko “dunyoning yarmi uning diktaturasini orzu qilishi”ni aytdi. Bu haqda u 25-mart kuni prezidentlik qasamyodini qabul qilish vaqtida ma’lum qildi.
Marosimda Lukashenko uni “Yevropaning so‘nggi diktatori” deb atayotganlar ustidan kulib, Belarusda demokratiya “o‘zini uning etaloni deb ataydiganlardan ko‘ra ko‘proq ekanini” aytdi.
Dunyoning yarmi bizning diktaturamizni, ya’ni amaliy ishlar va xalqimiz manfaatlariga xizmat qiluvchi diktaturani orzu qiladi, dedi u inauguratsiya nutqida.
Lukashenko mamlakatda “so‘z erkinligi masalasida ham hamma narsa joyida” ekanini ta’kidladi. U har bir kishi konstitutsiyaviy huquqqa va o‘z fikrini bildirish imkoniyatiga ega ekani, “biroq belaruslarning avlodlari tomonidan yaratilgan narsani yo‘q qilishga undash kerak emas”ligini qayd etdi.
Biz so‘z erkinligidan o‘z mamlakatimizni vayron qilish vositasi sifatida foydalanishga yo‘l qo‘ymaymiz, dedi Belarus rahbari.
2024-yil noyabr oyida Lukashenko mamlakatda “haqiqatan ham diktatura mavjud”ligini aytgan edi. Ammo bu “barqarorlik, xavfsizlik, tartib, mehribonlik va mehmondo‘stlik diktaturasi” ekanini qayd etgan. Prezident bunga “adolat diktaturasi” deb nom bergan.
25-mart kuni Lukashenko yettinchi marta prezidentlik lavozimiga qasamyod qildi. Inauguratsiya marosimi Mustaqillik saroyining tantanali marosimlar zalida o‘tkazildi.
Izoh (0)