“Liverpul” himoyachisi Trent Aleksander-Arnold 2025-yil 1-iyuldan boshlab Madridning “Real” klubi futbolchisiga aylanadi. Bu haqda jurnalist Sasha Tavolieri o‘zining X (sobiq Twitter) tarmog‘idagi sahifasida xabar berdi.
Manbaga ko‘ra, futbolchining agentlari “qirollik klubi” bilan besh yillik shartnoma bo‘yicha kelishuvga erishgan. Aleksander-Arnold yangi klubida mavsumiga 15 million yevro (soliqlardan tashqari) maosh oladi. Shuningdek, himoyachiga qo‘shimcha mukofot pullari va shartnoma imzolagani uchun bonus ham berilishi rejalashtirilgan.
So‘nggi haftalarda “Liverpul” rahbariyati 26 yoshli futbolchi bilan yangi shartnoma imzolash bo‘yicha harakat qilib ko‘rdi. Biroq Aleksander-Arnold “Real”ga o‘tishni istamoqda va uning bu qarorni hech narsa o‘zgartira olmaydi, deya qo‘shimcha qilindi manbada.
Eslatib o‘tamiz, Trent Aleksander-Arnold “Liverpul” akademiyasi tarbiyalanuvchisi hisoblanadi. U asosiy jamoa safida 2016-yildan buyon harakat qilib kelmoqda. Uning mersisaydliklar bilan amaldagi shartnomasi 2025-yilning iyunida yakunlanadi. Transfermarkt portali futbolchining qiymatini 75 million yevroga baholamoqda.
Izoh (0)