Samarqand viloyatida bir guruh yigitlar ko‘chada duch kelgan fuqarolarni urib, bezoriliklar qilayotgani aks etgan videolar tarqalgandi. Viloyat IIB holat yuzasidan ma’lumot berdi.
Qayd etilishicha, ijtimoiy tarmoqlarda jamiyatda yurish-turish qoidalarni qasddan mensimasdan, axloqqa zid qilmishlar sodir etgan bir guruh shaxslarning videolari ko‘plab muhokamalarga sabab bo‘lgan.
Surishtiruvlar natijasida ularning shaxsiga aniqlik kiritilib, holat 2025-yil 22-mart kuni tungi soat 01:00 atrofida sodir bo‘lgan. O‘zlariga oldindan notanish bo‘lgan shaxslar bilan tortishib, turli axloqqa zid harakatlar sodir etgan o‘n fuqaroning 7 nafari voyaga yetmagan shaxslar ekani aniqlandi.
Holat yuzasidan tergovga qadar tekshiruv harakatlari olib borilib, hujjatlar sud organlariga yuborildi. Sudda ularning harakatlariga qonuniy baho berildi.
Uch kishi 15 sutka ma’muriy qamoq jazosini oldi, 7 nafar bolaning ota-onalariga esa ma’muriy bayonnoma rasmiylashtirilib, ular jarimaga tortildi.
2024-yilning iyun oyida 21 yoshli qiz viloyatliklarni tilga olib bo‘lmas so‘zlar bilan haqorat qilib, shu qilmishi uchun 15 sutkaga qamalgandi. O‘sha yilning iyul oyi o‘rtasida Instagramʼdagi jonli efirda “qishloqilar odammas” deya haqoratlagan qiz jarimaga tortilgan edi. Instagram’da salbiy fikr bildirgan kuzatuvchilarga javob tariqasida behayo so‘zlar bilan viloyatliklarni haqorat qilgan qiz 10 sutkaga qamalgandi.
Shuningdek, Toshkent aholisini haqorat qilgan qiz 10 sutkaga qamalgan edi.
Izoh (0)