Olimlar Gizadagi mashhur Misr ehromlari ostida joylashgan “ulkan yerosti shahri”ni topdi. Bu haqda The New York Post xabar berdi.
Mutaxassislar radar uskunalaridan foydalanib, “Amenti zallari”ni topish maqsadida yer yuzasidan minglab fut chuqurlikdagi tasvirlarni yaratgan. Ularning fikricha, mazkur innovatsion tadqiqot “sun’iy yo‘ldosh ma’lumotlarini tahlil qilish va arxeologik izlanishlar chegaralarini qayta belgilab bergan”.
Tadqiqot natijasida piramidalar ostida 2100 futdan ortiq chuqurlikka cho‘zilgan sakkizta alohida vertikal silindrsimon artefaktlar aniqlangan. Bundan tashqari, 4000 fut chuqurlikda turli xil noma’lum tuzilmalar ham topilgan.
Olimlar piramida ichidagi beshta kichik, xonaga o‘xshash tuzilmalarni aniqlash uchun Sintetik Aperturali Radar (SAR) texnologiyasidan foydalangan. Shuningdek, tadqiqotchilar bir binodagi sarkofag noto‘g‘ri ravishda fir’avnning qabri deb hisoblanganini aniqlagan.
4500 yillik tarixga ega bo‘lgan bu mo‘jiza ostida yashirin xonalar va quduqlar mavjud. Yaqinda topilgan binolar esa yerosti koridorlari bilan bog‘langan. Tadqiqotchilar piramidaning markazida beshta alohida inshoot topilganini aytmoqda.
Denver universiteti tadqiqotchilaridan biri bunday inshootlarni aniqlash uchun texnologiya hali tasvirlarni yaratish darajasida yetarlicha rivojlanmaganini ta’kidlagan. Radar mutaxassisi Lorens Konyers yuzaning pastki qismida topilgan beshta kichik tuzilmalar u yerning tarixiga bog‘liq ekanini va ularning mavjudligi ehtimolini aytdi.
Uning so‘zlariga ko‘ra, bu yer qadimiy sivilizatsiyalar uchun piramidalar qurilishidan oldin ham muqaddas bo‘lgan.
Izoh (0)