Jahon chempionati saralashi doirasidagi O‘zbekistonga qarshi bahs oldidan Eronda jiddiy yo‘qotish bor. Bu haqda Varzesh3 nashri xabar bermoqda.
“Istiqlol” klubi yarim himoyachisi Ruzbeh Cheshmi jarohat sabab 8-turni o‘tkazib yuboradi.
Manbaga ko‘ra, futbolchi mashg‘ulot paytida mushaklarini jarohatlab olgan. Shu bois u forslarning O‘zbekistonga qarshi o‘yin oldi mashg‘ulotlarida qatnashmayapti hamda terma jamoa lagerini tark etgan.
Futbolchi Eron safidagi eng tajribali yarim himoyachilardan hisoblanadi. U jamoaning 7-tur doirasidagi BAAga qarshi bahsida 90 daqiqa o‘ynagan va Flashscore tomonidan 7 ballga loyiq ko‘rilgan.
Umuman olganda, Ruzbeh Eron tarkibida 36 bellashuvda maydonga tushib, 2 gol muallifiga aylangan.
Shuningdek, Muhammad Mohebi ham diskvalifikatsiya sabab O‘zbekiston bilan bo‘ladigan o‘yinda qatnasha olmaydi. “Rostov” klubi a’zosi JCH saralash bellashuvlari doirasidagi Qatar va BAAga qarshi uchrashuvlarda sariq kartochka olgan.
Eslatib o‘tamiz, Eron — O‘zbekiston bahsi 25-mart, seshanba kuni bo‘lib o‘tadi. Uchrashuv Tehrondagi “Ozodi” stadionida Toshkent vaqti bilan 21:00 da boshlanadi.
Izoh (0)