Qashqadaryo viloyatida o‘tkazilgan kompleks inspektorlik tekshiruvi natijalari yuzasidan hisobot yig‘ilishi o‘tkazildi. Bu haqda IIV matbuot xizmati xabar berdi.
Majlisda ishchi guruhning viloyatdagi o‘rganish yakunlariga ko‘ra hududlardagi mavjud kriminogen vaziyat, huquqbuzarliklarni barvaqt oldini olish, aholiga xizmat ko‘rsatish, murojaatlar bilan ishlash, jamoat tartibi hamda yo‘l harakati xavfsizligini taʼminlash, shuningdek, xodimlarning ijro hamda xizmat intizomiga rioya etish masalalari tanqidiy muhokama qilindi.
Majlisda xizmat faoliyatida jiddiy kamchiliklarga yo‘l qo‘ygan sohaviy xizmatlar hamda hududiy IIB rahbarlari faoliyatiga huquqiy baho berildi. Jumladan, ichki ishlar vazirining buyrug‘i bilan:
- viloyat IIB maʼnaviy-maʼrifiy ishlar va kadrlar bilan taʼminlash xizmati boshlig‘ining o‘rinbosari;
- viloyat IIB YHXX boshlig‘ining maʼnaviy-maʼrifiy ishlar bo‘yicha o‘rinbosari;
- Ro‘yxatdan o‘tkazish va imtihon olish bo‘lim boshlig‘i;
- Ko‘kdala va Kitob tumanlari IIB boshliqlari;
- Koson va Kasbi tumanlari IIB boshliqlarining birinchi o‘rinbosarlari;
- Muborak tumani va Qarshi shahri IIB jamoat xavfsizligi xizmati bo‘yicha o‘rinbosarlari egallab turgan lavozimidan ozod etildi.
Shuningdek, viloyat IIB boshlig‘ining jamoat xavfsizligi bo‘yicha o‘rinbosari, tergov boshqarmasi boshlig‘i, jamoat tartibini saqlash boshqarmasi boshlig‘i, yo‘l harakati xavfsizligi qidiruv-surishtiruv bo‘linmasi boshlig‘i, Kasbi tumani IIB boshlig‘i va uning maʼnaviy-maʼrifiy ishlar bo‘yicha o‘rinbosari, Qarshi shahar, Koson va Muborak tumani IIB boshliqlariga keskin intizomiy jazolar qo‘llanildi.
Izoh (0)