Afg‘oniston poytaxti Kobul shahrida O‘zbekiston qurilish materiallari uchun savdo uyi ochiladi, deb xabar bermoqda Savdo-sanoat palatasi matbuot xizmati.
Qayd etilishicha, ushbu savdo uyi 570 kvadrat metr maydonda joylashgan shourum hamda 500 kvadrat metr maydonda mahsulotlarni saqlash uchun omborxonadan tashkil topgan.
“Tadbirkorlar o‘z mahsulotlarini qulay shartlar asosida joylashtirish imkoniga ega bo‘lib, mahalliy kompaniyalar bilan bevosita muzokaralar olib borishlari mumkin”, deyiladi xabarda.
Mart oyining boshlarida Afg‘onistonning Mozori Sharif shahrida O‘zbekiston savdo uyi ochilgandi. Ushbu savdo uyi 220 kvadrat metr maydonda joylashgan bo‘lib, tadbirkorlarga mahsulotlarini Afg‘oniston bozoriga chiqarish, hamkorlar topish va eksportni kengaytirish uchun qulay platforma yaratadi. Unda farmatsevtika, elektrotexnika va qurilish materiallari uchun doimiy faoliyat yurituvchi shourum va omborxona mavjud.
O‘zbekiston va Afg‘oniston o‘zaro savdo hajmini 3 milliar dollarga yetkazmoqchi. 1-mart kuni O‘zbekiston investitsiyalar, sanoat va savdo vaziri Laziz Qudratov “Termiz” xalqaro savdo markaziga tashrif buyurgan Afg‘oniston savdo vaziri Nuruddin Aziziy boshchiligidagi delegatsiya bilan bu borada aniq chora-tadbirlarni belgilab olgandi.
Izoh (0)