BMT Bosh assambleyasi “Turkmanistonning doimiy neytralligi” rezolyutsiyasini qabul qildi. Mazkur hujjatga 67 ta davlat hammualliflik qilgan. Bu haqda Turkmaniston Tashqi ishlar vazirligi xabar berdi.
Hujjat BMT Bosh assambleyasining 79-sessiyasi 61-yalpi majlisida “Tinchlikni barpo etish va uni saqlash” kun tartibi doirasida konsensus asosida qabul qilingan. Rezolyutsiya tinchlik muzokaralarini o‘tkazish uchun neytral davlatlar hududlaridan foydalanish bo‘yicha tavsiyani o‘z ichiga oladi.
Turkmanistonning BMTdagi doimiy vakili Aksoltan Atayeva hujjatni taqdim etgan. U neytrallik maqomi tashqi siyosatining poydevori va Turkmanistonning tinchliksevar doktrinasini xalqaro maydonda amalga oshirishning asosi ekanini aytgan.
Turkmanistonning doimiy neytralligi to‘g‘risidagi ilk rezolyutsiya 1995-yil 12-dekabrda qabul qilingan. Atayeva shundan buyon mamlakat preventiv diplomatiya vositasi sifatida ushbu maqomning samaradorligini namoyon etib kelayotganini ta’kidladi.
Shuningdek, u neytrallik Turkmanistonning Konstitutsiyaviy qonuni bilan mustahkamlangani va turkman xalqining tarixiy merosi hamda an’analariga asoslanganini aytib o‘tdi.
Turkmaniston tashabbusi bilan 2017-yilda BMT Bosh assambleyasi 12-dekabrni Xalqaro neytrallik kuni deb e’lon qilgan edi. Shuningdek, BMT huzurida Neytralitet do‘stlari guruhi tashkil etildi va 2025-yil Xalqaro tinchlik va ishonch yili doirasida tadbirlar o‘tkazilmoqda.
Izoh (0)