Ispaniyaning “Barselona” klubi yozgi transfer oynasi vaqtida katta transferni amalga oshirishi mumkin. Klub “Nyukasl” hujumchisi Aleksandr Isakni o‘z safiga qo‘shib olishni maqsad qilgan. Bu haqida Sport.es nashri xabar bermoqda.
Klub sport direktori Deko ushbu transfer bo‘yicha harakatni boshlagan. Ammo xaridni amalga oshirish uchun kataloniyaliklarda yetarli mablag‘ yo‘q. Shu bois “Barselona” shvetsiyalik hujumchini o‘z safiga qo‘shib olsa, urugvaylik himoyachi Ronald Arauxo jamoani tark etishga majbur bo‘ladi.
O‘tgan yil oxirida Isakning agenti va “Barselona” vakillari – Deko hamda Boyan o‘rtasida uchrashuv bo‘lib o‘tgan. Bu uchrashuvda ko‘p narsa muhokama qilinmagan bo‘lsa-da, har ikkala tomon uchun ham ijobiy yakunlangan. Klub shved futbolchisi uchun katta pul sarflashga tayyor, shu bilan birga, Isak ham “Barselona” loyihasining bir qismi bo‘lishni istashini ma’lum qilgan.
Ma’lumot uchun, futbolchi joriy mavsum “Nyukasl” safida 33 ta bahsda maydonga tushib, o‘z hisobiga 26 ta gol va 5 ta assist yozdirib qo‘ygan. Uning klub bilan shartnomasi 2028-yilning yoziga qadar amal qiladi. Transfermarkt portali futbolchining narxini 100 million yevroga baholamoqda.
Izoh (0)