Ko‘pchilik jamoa animatsion film yaratishga kirishganda ularning barcha qahramonlar haqida aniq tasavvurlari bor, deb o‘ylaydi. Ammo rassomlar qahramonlarning tashqi ko‘rinishini bir necha bor qayta ishlashlariga to‘g‘ri keladi, nafaqat yuz tuzilishini, balki yoshini ham o‘zgartirishadi. Quyida sun’iy intellekt yordamida mashhur multfilmlardagi qahramonlarning dastlabki eskizlariga baho bering.
“Sohibjamol va maxluq” filmidagi Bell
Mashhur Disney multfilmida Bellga ovoz bergan Peyj O‘Xaraning aytishicha, bosh qahramon dastlab boshqacharoq ko‘rinishga ega bo‘lgan. Ilk chizgilarda qiz qora sochli, soch turmagi nozik, lablari qalin va qoshlari qoraroq tasvirlangan.
O‘Xaraning xotirlashicha, bunday Bell juda ham mukammal ko‘rinib, tomoshabinlar unga hamdardlik qilishlari qiyin bo‘lardi. “U haddan tashqari go‘zal edi”, deydi Peyj. Oxir-oqibat rassomlar qahramonning tashqi ko‘rinishini biroz o‘zgartirib, uni maftunkor, biroq “g‘alatiroq qiz”ga aylantirishgan.
“Oppog‘oy va yetti gnom” multfilmidagi Oppog‘oy
Rassomlar chizgan dastlabki eskizlarda Oppog‘oy biroz g‘alati ko‘rinishga ega edi. Qahramonning terisi o‘sha-o‘sha oq, sochlari silliq qora bo‘lsa-da, g‘amgin ko‘k ko‘zlari nisbatan katta ko‘rinardi. Shu sababli qiz goh doimo xafa, goh sal erkatoy bo‘lib tuyulardi. Oqibatda bosh qahramon qiyofasi qayta ko‘rib chiqilib, yanada tabiiyroq qilinadi.
“Pokahontas”dagi Pokahontas
Dastlab bosh qahramon tarixiy haqiqatga mos kelishi uchun o‘smir qiz bo‘lishi mo‘ljallangan edi. Biroq bu g‘oyadan voz kechib, Pokaxontasni voyaga yetgan qizga aylantirishga qaror qilinadi. Qolaversa, rassomlarga obraz chizish uchun biror aniq prototip berilmagandi. Bu rolda o‘n beshga yaqin qiz namuna vazifasini bajargan.
Barcha dastlabki eskizlarda qahramonning uzun qora sochlari tasvirlangan, ammo yuz tuzilishi biroz farqlanadi. Masalan, bir rasmda Pokaxontasning yuzi yumaloqroq, iyagi o‘tkir, yonoqlari keng, burni kichkina va lablari do‘mboq ko‘rinishda aks ettirilgan.
“Zolushka”dagi o‘gay ona — Tremeyn xonim
Dastlab Zolushka o‘gay onasining yuz tuzilishi ancha dag‘alroq edi, shuningdek, rassomlar ajinlar yordamida uning yoshini ta’kidlab ko‘rsatishgandi. Biroq multfilm yaratuvchilari Tremeyn xonim yuqori tabaqadan chiqqan shafqatsiz ayol sifatida namoyon bo‘lishi uchun qahramonga ko‘proq zodagonlarga xos ko‘rinish berishga qaror qilishadi.
“Alouddin”dagi Jasmin
Rassomlar Jasmin obrazining yakuniy variantiga kelgunlaricha ancha ter to‘kishlariga to‘g‘ri keladi. Dastlab ular malikani qizaloq qiyofasida tasvirlashgan, ammo keyinchalik bu g‘oyadan voz kechishgan.
Qahramonning yoshi belgilangandan so‘ng, animatorlar uning tashqi ko‘rinishining bir nechta variantini ishlab chiqishadi. Ulardan birida qizning moviy ko‘zlari, cho‘zinchoqroq yuzi, kichkina og‘zi va biroz manmanlik ifodasi bor edi. Barcha malikalarni faqat bir narsa birlashtirib turardi: ular nafis taqinchoqlar taqishardi.
“Suv parisi”dagi Arielning otasi — Triton
Oppoq sochli va chiroyli soqolli Triton g‘amxo‘r, ammo biroz zolim ota rolida juda tabiiy ko‘rinadi. Biroq agar rassomlar dastlabki g‘oyaga amal qilganlarida, suvosti hukmdorining o‘z rolini ijro etishi ancha mushkul bo‘lardi.
Gap shundaki, ilk eskizlarda shoh ancha yosh tasvirlangan, boshi butunlay kal, qora mo‘ylovli, quloqlari o‘tkir, qalin qoshlari chimirilgan edi. Yuz ifodasi ham ancha shubhali ko‘rinardi.
“Prostokvashinodagi ta’til” multfilmidagi Fyodor amaki
Eduard Uspenskiy Fyodor amakining qishloqdagi sarguzashtlari haqidagi hikoyalar turkumini yozishni endigina rejalashtirganida, bosh qahramonni o‘rta yoshli o‘rmonchi sifatida tasvirlamoqchi bo‘lgan. Ammo Boris Zaxoder uni bu fikridan qaytarib, qahramo bolaga aylanadi. Kitobni ekranlashtirishga qaror qilinganda, Fyodor amaki obrazi eng ko‘p muammo tug‘diradi. Barcha eskizlar rejissyorga mutlaqo yoqmaydi. Shunday qilib, bosh qahramonning rasmini o‘zi chizadi. To‘g‘ri, bola bu ko‘rinishda ham uzoq qolmaydi: ikkinchi qismdayoq uning tashqi qiyofasi yana o‘zgarib, tartibsiz sochi ko‘rkam turmakka aylanadi.
“Senimi, shoshmay tur”dagi Quyon va Bo‘ri
“Senimi, shoshmay tur!” multfilmini yaratishga birinchi bo‘lib rejissyor Gennadiy Sokolskiy qo‘l uradi. Biroq uning bosh qahramonlari studiya rahbariyatiga ma’qul kelmaydi. Bo‘ri va Quyon tanqidchilarga bolalar auditoriyasi uchun haddan tashqari yovuz tuyuladi. Sokolskiyga qahramonlarni qayta ishlashni taklif etishadi, ammo u rad etib, loyihadan chiqib ketadi. Vyacheslav Kotenochkin esa aksincha, rahbariyatga ham, tomoshabinlarga ham yoqqan yoqimli va sevimli Quyon va Bo‘ri obrazlarini yaratadi.
“Kichkintoy va Karlson”dagi Kichkintoyning onasi
Dastlab Kichkintoyning onasi biroz boshqacha ko‘rinishga ega bo‘lishi kerak edi. Uning sochi qisqa va och rangli, yuzi esa biroz dumaloqroq bo‘lgan. Biroq oxirgi variantdagi kabi u ham ko‘zoynak taqardi.
“Moana”dagi Moana
2016-yilda ekranlarga chiqqan “Moana” animatsion filmining bosh qahramoni o‘smir qiz edi. Dastlab ijodkorlar uni ancha yosh qilib tasvirlashni maqsad qilishgan. Ilk chizgilarda Moana taxminan 5 yoshda bo‘lib, sehrli qobiliyatlarga ega edi: narsalarni havoda muallaq tuta olish va okeanni boshqarish kabi. Biroq ish jarayonida ijodiy guruh Moanani o‘z qabilasini qutqaruvchi qahramon sifatida yanada ishonchliroq ko‘rsatish uchun katta yoshli qilib tasvirlashga qaror qiladi.
Izoh (0)