Sudan poytaxti Xartumda dron prezident saroyiga zarba berdi. Natijada uch nafar OAV xodimi halok bo‘lgan, bir necha kishi jarohat olgan. Bu haqda Al Hadath telekanali xabar bermoqda.
Nashr ma’lumotlariga ko‘ra, saroyga havodan hujum qilinishi sudanlik harbiylarning prezident saroyi va shahar markazidagi vazirlik binolari ustidan nazoratni qayta o‘rnatganliklari haqidagi bayonotlari fonida sodir bo‘lgan.
“Bugun bayroq ko‘tarildi, saroy qaytarib olindi va to‘liq g‘alabagacha bo‘lgan yo‘l davom etmoqda”, deya yozgan Sudan axborot vaziri Xolid al-Ayser o‘zining X ijtimoiy tarmog‘idagi sahifasida.
Telekanal ma’lumotlariga ko‘ra, hujum Sudan armiyasi qismlari bilan qarama-qarshilikda bo‘lgan Tezkor harakat kuchlari bo‘linmalariga tegishli dronlar tomonidan amalga oshirilgan. Hujum oqibatida harbiy xizmatchilar ham jarohat olgan.
Sudandagi vaziyat
2023-yil aprel oyida Sudan shiddatli mojaro maydoniga aylandi. Ikki asosiy shaxs — Suveren kengash (mamlakatning vaqtinchalik boshqaruv organi) rahbari, armiyaga ham rahbarlik qilayotgan Abdulfattoh al-Burhon va Tezkor harakat kuchlari rahbari Muhammad Hamdan Dagalo o‘rtasidagi kelishmovchiliklar qurolli to‘qnashuvlarga aylanib ketdi.
Merov va Xartumda armiya bilan THK o‘rtasida boshlangan to‘qnashuvlar tez orada butun mamlakatni qamrab oldi. Bu mojaroning oqibatlari dahshatli: minglab odamlar halok bo‘ldi, o‘n minglab odamlar jarohat oldi.
Sudandagi fuqarolar urushi o‘n minglab odamlarning hayotiga zomin bo‘ldi va 12 milliondan ortiq odamni boshpanasiz qoldirdi. Bu esa dunyodagi eng yirik ocharchilik va ko‘chish inqirozini keltirib chiqardi.
Izoh (0)