Xalqaro Olimpiya Qo‘mitasining (XOQ) Gretsiyaning Kosta-Navarino shahrida bo‘lib o‘tgan 144-sessiyasida boksning 2028-yilgi Los-Anjeles Olimpiadasi dasturiga rasman qaytarilishi bo‘yicha yakuniy qaror qabul qilindi. Bu haqda Milliy Olimpiya Qo‘mitasi xabar bermoqda.
Dastlab, boks 2028-yilgi Olimpiya o‘yinlari musobaqalari ro‘yxatidan chiqarilgan edi. Bunga Xalqaro boks assotsiatsiyasi (IBA) atrofida yuzaga kelgan muammolar sabab bo‘lgan. XOQ 2023-yil iyun oyida IBAni tan olishni rasman bekor qilgach, Olimpiadada boks musobaqalarining o‘tkazilishi so‘roq ostida qolgan edi.
Shunga qaramay, Parij-2024 Olimpiadasida boks musobaqalari XOQning maxsus ishchi guruhi nazorati ostida o‘tkazildi.
Endilikda Los-Anjeles Olimpiadasida boks musobaqalari 2023-yilda tashkil etilgan World Boxing federatsiyasi tomonidan boshqariladi. Hozirda ushbu tashkilot tarkibida 84 milliy federatsiya bor va yaqinda XOQ tomonidan vaqtinchalik tan olingan.
Izoh (0)