Prezident Toshkentda qurilgan High Town City majmuasini borib ko‘rdi

Shavkat Mirziyoyev 20-mart kuni Yunusobod tumanida barpo etilgan High Town City majmuasi borib ko‘rdi.

Prezident matbuot xizmatining xabar berishicha, davlat rahbari Toshkent shahrida amalga oshirilayotgan qurilish va obodonlashtirish ishlari bilan tanishuvini ushbu savdo majmuasini ko‘zdan kechirishdan boshladi.

High Town City majmuasi keng qamrovli bo‘lib, savdo va ko‘ngilochar markazi, biznes markazi, mehmonxona va zamonaviy turar joylarni o‘z ichiga olgan. Bunga 510 million dollar to‘liq xorijiy investitsiya yo‘naltirilgan.

Davlat rahbari savdo markazidagi zamonaviy tijorat va xizmat turlarini ko‘zdan kechirdi. 4 qavatli binoda savdo do‘konlari, jumladan, mashhur brendlarning shoxobchalari ochilgan. Restoran va kafelar, ko‘ngilochar o‘yingohlar, sport maydonlari, kinoteatrlar el xizmatida. Yer ostida avtoturargoh bor.

“Bir so‘z bilan aytganda, bu yerda odamlar savdo qilishi, dam olishi, sport bilan shug‘ullanib, vaqtini chog‘ o‘tkazishi uchun barcha sharoitlar yaratilgan. Majmua bir kunda 5 ming kishiga xizmat ko‘rsatish quvvatiga ega. Unda 1 ming 500 kishi ish bilan ta’minlandi”, deyiladi xabarda.

Prezident majmuaning iqtisodiy ahamiyati va aholi uchun qulayligini e’tirof etib, investor va tadbirkorlarga ko‘mak berish bundan keyin ham davlat siyosatining strategik yo‘nalishi bo‘lib qolishini ta’kidladi. Milliy mahsulotlarni brendga aylantirish, ularni tashqi bozorlarda tanishtirish bo‘yicha mutasaddilarga ko‘rsatmalar berdi.

Savdo markazida shinam kitob do‘koni ham ochilgan. Shavkat Mirziyoyev bu tashabbusni olqishlab, metro bekatlari, kutish joylarida ham mo‘jaz kitob do‘konlari tashkil etish maqsadga muvofiqligini aytdi.

Davlat rahbari o‘yin maydonchasidagi bolajonlarni ko‘rib, mehr-e’tiborini izhor etdi.

Bugungi barcha sa’y-harakatlar mamlakat kelajagi uchun qilinayotgani, buning uchun bolalar yaxshi o‘qib, aqliy va ijodiy salohiyatini rivojlantirib borishi kerakligini ta’kidladi.

High Town City majmuasida yana zamonaviy uy-joylar quriladi.

Uy-joylar loyihasi taqdimotiga ko‘ra, 1 500 ta xonadondan iborat 28 ta ko‘p qavatli uy bunyod etiladi. Majmua hovlisi avtomobillar uchun yopiq va yashil hudud bo‘ladi. Bolalar bog‘chasi, o‘yin maydonchasi, tennis korti, yerosti avtoturargoh tashkil etiladi. Majmua hududi to‘liq Wi-Fi bilan qamrab olinadi hamda binolarda shovqinsiz liftlar o‘rnatiladi.

Yana bir loyihaga ko‘ra, Bektemir tumanida Chirchiq daryosi yaqinida ko‘p qavatli uylar, savdo va xizmat binolari qurish ko‘zda tutilgan. Buning natijasida tumanda urbanizatsiya jadallashib, yangi markaz paydo bo‘ladi.