Iqtisodiy tadqiqotlar va islohotlar markazi 2025-yilning fevral oyidagi O‘zbekiston avtomobil bozorini tahlil qilish natijalarini taqdim etdi.
Unda avtomobil bozoridagi asosiy tendensiyalar va o‘zgarishlar qayd etilgan.
Birlamchi avtomobil bozoridagi vaziyat
Hozirgi sharoitda yengil avtomobillar bozorida sotuvlarning umumiy pasayishi kuzatilmoqda, bu asosan xorijiy avtomobil segmentidagi faollikning pasayishi bilan bog‘liq.
Fevral oyida yengil avtomobillar savdosi o‘tgan oyga nisbatan 14,5 foizga kamaydi va 67,2 mingta avtomobilni tashkil etdi.
Oy davomida mahalliy ishlab chiqarilgan yangi avtomobillar sotuvi deyarli o‘zgarmagan va 21,7 ming dona avtomobilni tashkil etgan bo‘lsa, yangi xorijiy avtomobillar segmentida sotuvlar 2 barobardan ortiqroqqa kamaydi.
Avtomobillarning ikkilamchi bozori
Yengil avtomobillarning ikkilamchi bozoridagi vaziyat ham faollikning pasayishi bilan tavsiflanadi.
Fevral oyida sotuvlar 43,3 ming dona avtomobilni tashkil etib, joriy yilning yanvariga nisbatan 16 foizga kamaygan.
Elektr avtomobil bozorining dinamikasi
Yangi yengil elektromobillar segmenti faollikning pasayishini ko‘rsatmoqda. Fevral oyida sotuvlar 2,9 mingta elektromobilni tashkil etdi, bu o‘tgan oyga nisbatan 11 foizga kam, o‘tgan yilning shu davriga nisbatan esa faollik ikki baravardan ko‘proq oshdi.
MHTI mutaxassislarining ikkilamchi avtomobil bozori bo‘yicha avvalgi tahlili
2024-yilning noyabr oyida o‘rtacha foydalanilgan mahalliy ommabop avtomobillar hamda xorijiy lyuks avtomobillar o‘rtacha narxlari pasaygan bo‘lsa, mahalliy lyuks va elektromobillar narxlarida sezilarli o‘zgarish kuzatilmadi. 2024-yil dekabr oyida ikkilamchi avtomobil bozorida faollik pasayishda davom etdi va bu o‘rtacha narxlarda o‘z aksini topgandi. 2025-yilning yanvarida O‘zbekiston ikkilamchi avtomobil bozorida yanvar oyida pasayish davom etdi. Mahalliy ommabop avtomobillar narxi 2024-yilning dekabr oyidagiga nisbatan arzonlashdi.
Izoh (0)