Ijtimoiy tarmoqlarda noma’lum shaxs voyaga yetmagan qizga nisbatan kuch ishlatgani aks etgan video tarqalib, turli muhokamalarga sabab bo‘lmoqda. IIBB mazkur holat yuzasidan ma’lumot berdi.
Unga ko‘ra, holat joriy yilning 10-mart kuni, taxminan, soat 16:30 larda Yashnobod tumani, “Do‘stobod” mahallasi hududida sodir bo‘lgan. 2006-yilda tug‘ilgan, 2-guruh nogironi, ruhiy-asab kasalliklari dispanserida ro‘yxatda turuvchi X.D. shu yerdan o‘tib ketayotgan 2013-yilda tug‘ilgan qizga nisbatan kuch ishlatgan.
Qiz baqirgani natijasida X.D. uni qo‘yib yuborib voqea joyidan ketib qolgan. Mazkur holat yuzasidan o‘tkazilgan tekshiruv jarayonida qizga zarar yetmagani aniqlangan va u bilan psixolog tomonidan suhbat o‘tkazilgan.
Fuqaro X.D. voqea sodir bo‘lgan kunning o‘zida shahar ruhiy-asab kasalliklar shifoxonasiga joylashtirilgan. Yashnobod tumani IIO FMB tomonidan tergovga qadar tekshiruv harakatlari davom etmoqda. Tekshiruv yakuni bo‘yicha qonuniy qaror qabul qilinishi ta’minlanadi.
Toshkent viloyati Nurafshon shahrida 60 yoshli erkak 6 yoshli qo‘shnisiga tegajog‘lik qilganlikda ayblanayotgani haqida xabar berilgandi. Shuningdek, Andijonda maktab direktori o‘rinbosari o‘quvchi qizlarga tegajog‘lik qilayotgani aytilgan, Toshkentda metro vagonida notanish qizga tegajog‘lik qilgan erkak besh sutkaga qamalgan edi.
Bundan tashqari, Andijonda 13 yoshli qizga shilqimlik qilgan erkak 5 sutkaga qamalgan.
Izoh (0)