Toshkent shahrida 18-martdan isitish mavsumi yakunlanadi. Bu haqda poytaxt hokimligi matbuot xizmati xabar berdi.
Qayd etilishicha, belgilangan me’yorlarga ko‘ra, isitish mavsumi o‘rtacha sutkalik havo harorati 8 daraja iliqdan yuqori bo‘lgan 5 kunlik davr tugagan kunning ertasidan boshlab tugaydi. So‘nggi hafta davomida Toshkentda kunduz kunlari havo harorati 18-19 daraja va undan yuqori, kechalari esa 8 daraja iliqdan pastga tushmayapti.
Gidrometeorologiya markazining prognoziga ko‘ra, yaqin 5 kun ichida kunduzgi havo harorati 20-22 daraja, kechasi esa 10 darajadan yuqori bo‘ladi. Ayni paytning o‘zida ham poytaxtda o‘rtacha sutkalik harorat 12-13 darajadan oshgan, bu isitish mavsumini yakunlash uchun belgilangan me’yorlarga mos keladi.
Yuqoridagilardan kelib chiqib, 2024—2025-yillardagi isitish mavsumi rasman 2025-yil 18-martda yakunlanishini ma’lum qilamiz, deyiladi xabarda.
Toshkent shahrida 2024—2025-yilgi isitish mavsumi 2024-yil 7-noyabrdan boshlangandi. Isitish mavsumi yakunlangach, keyingi mavsumga tayyorgarlik ishlari ko‘riladi.
Toshkent shahrida so‘nggi yillarda isitish mavsumining boshlanish va tugash sanalari:
2020/21: 2020-yil 17-oktyabrdan 2021-yil 7-aprelgacha (174 kun);
2021/22: 2021-yil 14-oktyabrdan 2022-yil 1-aprelgacha (170 kun);
2022/23: 2022-yil 24-oktyabrdan 2023-yil 10-martgacha (138 kun);
2023/24: 2023-yil 8-noyabrdan 2024-yil 26-martgacha (140 kun).
Izoh (0)