Xorazm viloyatida yashovchi Shuhrat Rajabov “Daryo”ga murojaat qilib, o‘g‘li Jumaniyoz Otaboyev 2024-yilning 11-iyun kuni Xiva—Urganch yo‘lida YTHga uchrab, hayoti uchun og‘ir tan jarohatlari olgani, shunga qaramasdan, sud tomonidan rul boshqaruvida bo‘lgan degan ayblov bilan nohaq ayblanib, javobgar qilinganini gapirib bergandi.
Murojaatchining “Daryo”ga bildirishicha, mustaqil ekspert o‘g‘li bilan bog‘liq holatni o‘rganib chiqib, Jumaniyoz Otaboyev mashina boshqaruvida bo‘lmagani haqida xulosa bergan bo‘lsa-da, mazkur ishni ko‘rib chiqqan ikkinchi instansiya sudi ham murojaatchining o‘g‘lini aybdor deb topgan.
O‘g‘lim Jumaniyoz Otaboyev 2024-yilning 11-iyun kuni Xorazm viloyatining Xiva—Urganch yo‘lida avtohalokatga uchragandi. Bu YTH videotasvirlarga tushib qolgan. Haydovchi o‘zi o‘tirgan tomonni olib qochgani uchun ham yo‘lovchi o‘rindig‘ida o‘tirgan farzandim juda ko‘p va og‘ir tan jarohati olgan. Uning yonida bo‘lgan va sudning taxminicha, yo‘lovchi o‘rindig‘ida ekani aytilgan fuqaro esa deyarli hech qanday jarohat olmagan. Shunga qaramasdan, tergov jarayonida o‘g‘limni aybdorga chiqarishdi.
Birinchi instansiya sudida o‘g‘lim aybdor deb topilib, javobgar qilindi. Garchi sudda davlat eksperti bergan xulosada o‘g‘lim va uning yonidagi sherigi ikkalasiga ham rul boshqaruvida bo‘lgan bo‘lishi mumkin degan mavhum xulosa bergan bo‘lsa-da, sudlov hayʼati negadir rulda o‘g‘lim bo‘lgani haqidagi to‘xtamga kelib, uni aybdor qilib chiqdi, deydi murojaatchi.
Shuhrat Rajabovning maʼlumot berishicha, advokati Ilhom Yoqubov Toshkent tibbiyot akademiyasining Urganch filiali direktoriga advokatlik so‘rovi yuborib, himoyasi ostidagi Jumaniyoz Otaboyev bilan bog‘liq YTH borasida tug‘ilgan savollarga javob topish uchun mutaxassis, kriminalist fikriga muhtojlik sezayotganini yozib, yordam so‘ragan.
Bunga javoban filialning patomorfologiya kafedrasi dotsenti, birinchi toifali davlat sud eksperti Ismoilov YTHga doim holatlarni o‘rganib chiqib, ishtirokchilar — Jumaniyoz Otaboyev hamda Isobek Kamuljonovlarning olgan tan jarohatiga qarab, avariya sodir bo‘lganda kim qaysi o‘rindiqda o‘tirganiga aniqlik kiritishga harakat qilgan.
Fuqaro Kamuljonov Isobekning badanidagi barcha jarohatlarning o‘rni, avtomashina saloni ichidagi oldingi qismi va anjomlar deformatsiyasini hisobga olganda u haydovchi o‘rindig‘iga o‘tirgan. Buni avtomashinaning haydovchi o‘tiradigan qismining torligi, haydovchi baxtsiz hodisa bo‘lishiga tayyor bo‘lib rulni mahkam ushlab olgani, oyoqlari bilan salon ichi, pastki qismiga hamda dumba sohasi bilan o‘rindiqqa zich bo‘lib o‘tirgani tasdiqlaydi, deyiladi mutaxassis xulosasida.
Birinchi toifali davlat sud eksperti Ismoilovning YTHdagi ikkinchi ishtirokchi, ayni paytda sud tomonidan asosiy aybdor deb topilgan Jumaniyoz Otaboyev haqidagi fikrlariga quloq solinsa, u tergov va sud xulosasiga teskari fikr bergan.
Jumaniyoz Otaboyevning badanidagi jarohatlar o‘rni, ularning ko‘pligi va og‘irlik darajasi inobatga olinsa, bu jarohatlar u avtomashinaning yo‘lovchi o‘rindig‘ida erkin va muallaq holatda, hech bir xavfni gumon qilmay o‘tirganidan darak beradi. Chunki u yo‘lda harakatlanib kelayotgan mashinaning qarama-qarshi tomonida o‘tirmagan. Buni uning badanidagi jarohatlar o‘rni va fotosuratlar ham tasdiqlaydi, deydi ekspert.
Ushbu YTH bilan bog‘liq ishni ko‘rib chiqqan dastlabki instansiya sudiga maʼlumot taqdim qilgan davlat eksperti Jumaboyev Jumaniyoz Otaboyevning badanidagi jarohatlar qachon va qay holatda orttirilgan degan savollarga tergov surishtiruv jarayonlarida aniqlik kiritilishi kerak desa, qo‘shimcha ekspertiza harakatlarini olib borgan davlat eksperti Qo‘ziyev esa Jumaniyoz Otaboyevning badanidagi jarohatlar rul boshqaruvi paytida orttirilgan bo‘lishi mumkinligini taxmin qilgan. Biroq murojaatchi har ikkala ekspert ham mavjud dalillarni yetarlicha ko‘zdan kechirmayotganini, ularning noto‘g‘ri xulosasi ekan sudning ularning manfaatiga zid qaror chiqarishiga sabab bo‘layotganini aytmoqda.
Biz aynan davlat ekspertizasini boshqa viloyatda o‘tkazishni so‘rab sudga iltimosnoma kirityapmiz. Natija boshqacha bo‘lishini isbotlash maqsadida mustaqil ekspert xulosasini ham berdik. Ammo sud bunga eʼtibor qaratmadi. Qayta ekspertiza tayinlamadi. Yana dastlabki instansiya qarorini maʼqulladi, deydi Shuhrat Rajabov.
Eslatib o‘tamiz, avvalroq murojaatchi YTH sodir bo‘lgani, o‘sha YTHda o‘g‘lining 8 ta joyi singanini aytib bergandi.
YTH videosiga eʼtibor berilsa, Damas haydovchisi ro‘paradan kelayotgan mashinaga o‘zi tomondan emas, yo‘lovchi o‘tirgan tomon bilan urilgan. Haydovchi odatda har doim o‘zini olib qochishi va yo‘lovchi o‘tirgan tomon bilan YTH sodir etishini ko‘pchilik, ayniqsa, haydovchilar yaxshi biladi. O‘sha kungi holatda ham haydovchi shunday yo‘l tutgan.
YTH natijasiga qarasak, o‘g‘lim rulda o‘tirgan deyilyapti va sakkizta joyidan sinyapti. YTHdan keyin yurolmay qolyapti. Yonida yo‘lovchi sifatida o‘tirgan, yaʼni Damas’ning Tracker’ga urilgan tomonida bo‘lgan yo‘lovchiga esa hech narsa qilmayapti. Shunday bo‘lishi mumkinmi?, degandi u.
“Daryo” voqealar rivojini kuzatishda davom etadi.
Izoh (0)