Toshkent hokimligi tez orada 2024—2025-yilgi isitish mavsumini yakunlash to‘g‘risida qarorni qabul qiladi, deb xabar berdi Veolia Energy.
O‘zbekiston gidrometeorologiya xizmati ma’lumotlariga ko‘ra, 2025-yilning 8-martdan 14-martigacha bo‘lgan davrda Toshkentda o‘rtacha sutkalik harorat 11,6 (minimal — 9 daraja 8-martda, maksimal — 13,1 daraja 14-martda) daraja bo‘ldi.
Vazirlar Mahkamasining “Ko‘p qavatli uylarda issiqlik ta’minoti xizmati ko‘rsatish tartiblari to‘g‘risida”gi qaroriga ko‘ra, o‘rtacha sutkalik havo harorati ketma-ket besh kun mobaynida 8 darajada saqlanib tursa, isitish mavsumi yakunlanadi.
Ushbu qarorga asoslanib, Toshkent shahri hokimligi tez orada 2024–2025-yillar uchun isitish mavsumini yopish haqida qaror qabul qiladi, deyiladi xabarda.
Ma’lum qilinishicha, isitish mavsumi yakunlangach, keyingi mavsumga tayyorgarlik ishlari ko‘riladi. Yilning sovuq mavsumida issiqlik ta’minoti yanada barqaror va sifatli bo‘lishi uchun issiqlik tarmoqlari, mahalliy qozonxonalar va nasos stansiyalarida joriy hamda kapital ta’mirlash olib boriladi.
Toshkent shahrida so‘nggi yillarda isitish mavsumining boshlanish va tugash sanalari:
2020/21: 2020-yil 17-oktyabrdan 2021-yil 7-aprelgacha (174 kun);
2021/22: 2021-yil 14-oktyabrdan 2022-yil 1-aprelgacha (170 kun);
2022/23: 2022-yil 24-oktyabrdan 2023-yil 10-martgacha (138 kun);
2023/24: 2023-yil 8-noyabrdan 2024-yil 26-martgacha (140 kun).
Toshkent shahrida 2024—2025-yilgi isitish mavsumi 2024-yil 7-noyabrdan boshlangandi.
Izoh (0)