Toshkentdagi mehmonxonalarning biri oldida janjal sodir bo‘lgani, oqibatda bir kishi og‘ir jarohat olib, komaga tushgani haqida xabarlar va holat aks etgan videolar tarqaldi.
Unda erkak bir ayol bilan janjallashayotgani, uni himoya qilishga uringan erkak bir necha mushtdan so‘ng hushidan ketganini ko‘rish mumkin. Tajovuzkor erkak yana bir shaxsga va janjallashayotgan ayolga ham tashlanib, ularni kaltaklagan.
Tarmoqlarda aytilishicha, hushidan ketgan erkakda 5 soatlik jarrohlik amaliyoti o‘tkazilgach, shifokorlar uni sun’iy komaga tushirdi. Uning hayoti xavf ostida qolmoqda. Ikki nafar bolasi bor erkak vafot etishi yoki bir umr nogiron bo‘lib qolishi mumkin.
Poytaxt IIBB matbuot xizmatining ma’lum qilishicha, voqea 16-mart tungi soat 02:30 larda sodir bo‘lgan. Yakkasaroy tumanida joylashgan restoranlardan birida mijoz sifatida kelgan 1995-yilda tug‘ilgan A.SH. o‘zining tanishi — 1985-yilda tug‘ilgan X.A. bilan o‘rtalarida kelib chiqqan nizo sababli o‘zaro janjallashgan. 1990-yilda tug‘ilgan B.A. ularni ajratishga harakat qilgan vaqtida A.SH. uni urib, tan jarohati yetkazgan.
Oqibatda В.A. “bosh miya jarohati, o‘ng yuzidan lunji yirtilgan jarohati va spirtdan zaxarlanish” tashxisi bilan shifoxonaga olib borilgan.
Mazkur holat yuzasidan Yakkasaroy tumani IIO FMB Tergov bo‘limi tomonidan Jinoyat kodeksining 277-moddasi (bezorilik) bilan jinoyat ishi qo‘zg‘atilgan. Tergov harakatlari davom etmoqda. Yakuni bo‘yicha qonuniy qaror qabul qilinishi ta’minlanadi.
Izoh (1)
eng oxir jaza berish kerak