Toshkent shahar Olmazor tumanida 15 yoshli bola 9-qavatdan tushib ketdi. Bosh prokuratura holat yuzasidan ma’lumot berdi.
Keltirilishicha, 15-mart kuni soat taxminan 15:29 lar atrofida Olmazor tumani “Taraqqiyot” MFYda joylashgan uyning to‘qqizinchi qavatidan 2010-yilda tug‘ilgan bola tushib ketgani to‘g‘risida xabar kelib tushgan.
Aniqlanishicha, 1995-yilda tug‘ilgan L.R. bolaning ko‘p qavatli binoning to‘qqizinchi qavatidan yerga tushib ketganini ko‘rib, zudlik bilan birinchi yordam ko‘rsatgan va tez tibbiy yordam xodimlarini chaqirtirgan. Xodimlar tomonida bemor shifoxonaga olib borilgan.
Bola ota-onasi bilan mazkur uyda ijarada yashagan.
Bundan avval Samarqand shahrida 19 yoshli qiz o‘zini 9-qavatdan tashlab joniga qasd qilgani haqida xabar berilgan edi. Hozirda marhumaning barcha oila a’zolari tergovga jalb qilingan. Onasi marhuma bir qo‘ng‘iroqdan so‘ng birdaniga o‘zini tashlab yuborganini bildirgan.
Shuningdek, 2025-yil yanvarida Qo‘qondagi talabalar turar joyida talaba qiz o‘z joniga qasd qilgani haqida xabar berilgan edi. Prokuratura surishtiruv natijalariga ko‘ra, mazkur holat shaxsiy muammolar sababli sodir bo‘lgani aniqlangan va jinoyat ishi qo‘zg‘atish rad etilgan.
Kuni kecha esa Toshkentdagi xonadonlardan birida fuqaro oshxonada gaz plitasini yoqish orqali o‘z joniga qasd qilishga uringan. Natijada gaz havo aralashmasi chaqnashi sodir bo‘lib yong‘in kelib chiqqandan so‘ng ushbu fuqaro 9-qavatdan o‘zini tashlash orqali halok bo‘lgani aniqlangan.
Izoh (0)