Xonanda va aktrisa Selena Gomes o‘zining qallig‘i, musiqiy prodyuser Benni Blanko bilan hamkorlikdagi “I Said I Love You First” nomli yangi albomi premyerasi munosabati bilan “12 Days of Really Rare Stuff” (“Haqiqatan ham noyob buyumlarning 12 kuni”) kampaniyasini boshladi. Unga ko‘ra, Selena har kuni muxlislari bilan noyob xotiralarni o‘rtoqlashadi va ularga ramziy sovg‘alar taqdim etadi.
Mashhurlar odatda qimmatbaho buyumlarini kimoshdi savdosida katta pullarga sotishadi. Biroq Gomes barchani hayratda qoldirgan harakatni amalga oshirdi — u asl narxi 3250 AQSH dollari bo‘lgan Jacquie Aiche uzugini atigi 12 dollarga sotdi. Taqinchoq xonandaning Blanko bilan ishqiy munosabatlarini tasdiqlash uchun 2023-yil dekabr oyida ijtimoiy tarmoqlarga joylashtirilgan edi. “B” harfi bilan bezatilgan uzuk yagona nusxada ishlab chiqilgan.
“#12DaysOfReallyRareStuff harakatining birinchi kunida munosabatlarimiz boshlangani haqida eslatib turuvchi buyumni tanlash maqsadga muvofiq bo‘lib deb o‘yladim”, deb yozadi xonanda e’londa.
Kampaniyaning ikkinchi kunida Selena muxlislarga dizayni ustida o‘zi ish olib borgan 395 dollarlik sumkani yutib olish imkoniyatini berdi. Ba’zilar buni Selena Gomesning ajoyib marketing strategiyasi deb hisoblashsa, boshqalar uning muxlislariga bo‘lgan samimiy hurmati sifatida qabul qilishmoqda.
Izoh (0)