“Ko‘z yoshlar malikasi”, “Men aqldan ozganman, lekin hammasi joyida”, “Prodyuserlar” va boshqa dramalardagi rollari bilan tanilgan janubiy koreyalik aktyor Kim Su Xyon 24 yoshli aktrisa Kim Se Ron bilan munosabatda bo‘lganlikda va uning joniga qasd qilishiga sababchi bo‘lganlikda ayblanmoqda.
Aktyorning o‘tmishi haqida ma’lumotlar yoritilgan yangi video esa unga nisbatan ko‘plab tanqid va salbiy munosabatlarga sabab bo‘ldi. Mazkur rolik 11-mart kuni Garosero tadqiqot institutining YouTube kanalida e’lon qilindi.
Videomurojaatda 2025-yil 16-fevralda vafot etgan aktrisa Kim Se Ronning xolasi ko‘rsatma berdi. Uning so‘zlariga ko‘ra, jiyani Kim Se Ro aktyor Kim Su Xyon bilan 15 yoshidan boshlab 6 yil davomida — 2015-yilning kuzidan 2021-yilgacha uchrashib yurgan. Bu mish-mishlar avvalroq ommaviy axborot vositalarida paydo bo‘lgan edi, ammo ma’lumot ikkala tomondan rad etilgan edi.
Ularning ikkisi ham “Gold Medalist” agentligining a’zosi edi. 2022-yilda aktrisa mast holatda mashina haydagani tufayli mojarolar markaziga tushib qoldi, shundan so‘ng o‘sha yilning may oyida leyblni tark etdi. Aktyor unga tovon pulini to‘lashda yordam berdi, biroq agentlik shundan so‘ng yana 700 million von miqdorda tovon puli talab qildi. Moliyaviy qiyinchiliklar va qarzdorlik ham Kim Se Ronning o‘z joniga qasd qilishiga sabablardan biri bo‘lgan.
Videoda jurnalistlar Se Ronning tirikligida yozgan maktublarini e’lon qildi, u yerda aktrisa yordamga muhtoj bo‘lganida Kim Su Xyon bilan bog‘lanishga uringan, ammo barchasi behuda bo‘lgani yoritilgan:
Shartnomani uzaytirish o‘rniga men moliyaviy majburiyatlarni o‘z ichiga olgan yangi hujjatni imzolashga majbur bo‘ldim. Shartnomani yangilash vaqti kelganida agentlik va Kim Su Xyonning o‘zi bilan bog‘lanishga harakat qildim, lekin u meni nazarga ilmadi. So‘ng menga tahdidlarga to‘la yuridik xabarnoma keldi.
Aktrisa ko‘p martta Kim Su Xyondan yordam so‘ramoqchi bo‘lgan, ammo u aloqaga chiqmagan. Shu sababli Kim Se Ron ijtimoiy tarmoqlarda sobiq qallig‘i bilan birga tushgan arxiv suratlarni joylashtirgan. Bu esa ularning o‘tmishdagi munosabatlariga birinchi dalil bo‘lgan.
Bundan avval “Gold Medalist” agentligining buyurtmasiga ko‘ra marhumaning obro‘siga putur yetkazadigan turli maqolalar e’lon qilindi, bu esa aktrisaning qadr-qimmatini tushirib yubordi. Obro‘sizlantiruvchi ruhdagi maqolalarning barchasi aktrisaga nisbatan jamoatchilikning salbiy munosabatini keltirib chiqardi, bu esa uning o‘limiga olib keldi. Shu sababli Kim Se Ron qarindoshlari ommaviy videobayonot berishga majbur bo‘ldi.
Video e’lon qilingach, nafaqat Janubiy Koreyadagi barcha muxlislar, balki xorijdagi internet foydalanuvchilari hozirda Kim Su Xyonni qattiq qoralamoqda. Ammo agentlik unga tegishli barcha ayblovlarni rad etdi.
Hozirda Kim Su Xyon nafaqat Se Ronning o‘z joniga qasd qilishiga sababchi bo‘lganlikda, balki bir necha yil avval o‘sha paytda voyaga yetmagan qiz bilan munosabat o‘rnatganlikda ayblanmoqda.
Foto: The Girl
Izoh (0)