Egizaklar — hayotning ajoyib sovg‘asi, bu ota-onalar uchun ikki karra ko‘proq baxt, quvonch va muhabbatdir. O‘zbek shou-biznesi vakillari orasida esa bu baxtni his qilayotganlar ko‘plab topiladi.
“Layli va Majnun” guruhi
4-mart kuni “Layli va Majnun” dueti xonandasi Mushtariybonu 6 yillik sabr va kutishlardan so‘ng egizaklarni dunyoga keltirdi ularga Umar va Rayyona deb ism qo‘ydi. Baxtli ona bu haqida o‘z Instagram sahifasida eʼlon qildi.
Nigina Nabiyeva
“Olmali aymoqcha” qo‘shig‘i bilan mashhur xonanda 17-yanvarda egizak farzandlarni dunyoga keltirdi. Nigina Nabiyeva endilikda olti farzand — to‘rt o‘g‘il va ikki qizning onasi.
Yodgora Ziyomuhammedova
Umrini yosh tomoshabinlar uchun bag‘ishlagan ustoz sanʼatkor, O‘zbekistonda xizmat ko‘rsatgan artist Yodgora Ziyomuhammedovaning uch farzandi bo‘lib, egizak qizlari to‘ng‘ich hisoblanadi.
— Fotima va Zuhra 1977-yilning may oyida o‘n daqiqa farq bilan dunyoga kelgan. Ular muddatidan oldin, yaʼni yetti oyligida tug‘ilgan. Shu bois to‘qqiz oylik bo‘lgunga qadar havo harorati bir xil xonada parvarishlaganmiz. Bu borada onam va qaynonam yaqindan ko‘maklashgan.
Egizaklarning ikkisiga ham teng muomala qilib, ko‘ngliga birdek qarash kerak. Masalan, Fotima biror voqeani aytgach, hech qancha vaqt o‘tmay, Zuhra ham xuddi o‘sha voqeani so‘zlab bersa, birinchi eshitib turgandek, jim tinglashga majbursiz. Qizlarimni hozirgacha xafa qilmaslikka harakat qilaman. Ularni birin-ketin turmushga uzatganman. Zuhraning uch qizi, Fotimaning esa ikki o‘g‘il farzandi bor. Bugungi kunda Fotima va Zuhra “Tantana” bolalar ashula va raqs ansamblida rahbarlik lavozimida faoliyat yuritadi, — deydi Yodgora Ziyomuhammedova.
Yulduz Hamidova
“Temir ayol”, “Tangalik bolalar”, “Chavandoz”, “Tutash taqdirlar” kabi film va seriallardagi rollari bilan tanilgan O‘zbekistonda xizmat ko‘rsatgan artist Yulduz Hamidovaning ham egizak qizlari bor. Aktrisa bir yildan beri Amerikaning Los-Anjeles shahrida yashab kelmoqda. Okean ortiga ketishiga farzandlari — Fotima va Zuhra sabab bo‘lgan.
— Qizlarimga besh yoshligidan ingliz tilini o‘rgatganman. Ular Toshkentda ingliz tili chuqurlashtirilgan maktabni tamomlagach, xorijda o‘qishni davom ettirishni istashdi. Avval Malayziyaga, keyin AQSHga o‘qishga kelishdi. Amerikaga qizlarim bilan kelganman, — deydi aktrisa.
Rayhon G‘aniyeva
O‘zbekistonda xizmat ko‘rsatgan artist Rayhon G‘aniyeva va aktyor Yigitali Mamajonov 2012-yilning noyabrida turmush qurgan. Juftlik 2014-yil may oyida egizak farzand ko‘rgan bo‘lib, ularga Islom va Imron deb ism qo‘yishgan.
2016-yilning mayida esa Rayhon va Yigitalining nikohi rasman bekor qilingan. Egizak o‘g‘illar xonanda Rayhon qaramog‘ida qolgan.
Avaz Oxun
Ommaga shaxsiy hayoti haqida kam gapiradigan so‘z ustasi Avaz Oxunning egizak qizlari borligini, shubhasiz, ko‘pchilik bilmaydi. Uning rafiqasi 2019-yil mayida Fotima va Zuhrani dunyoga keltirgan.
To‘rt farzandning otasi bo‘lgan Avaz Oxun ijtimoiy tarmoqlardagi sahifalariga oilaviy suratlarini qo‘ymaydi.
Diyorbek Bekjonov
Taniqli sanʼatkorlar — Mehri va Aleksandr Bekjonovlarning o‘g‘li Diyorbek Bekjonov 2019-yili ilk marta otalik baxtiga erishgan. Uning Fotima va Zuhra ismli qizlari bor.
27 yoshli Diyorbek ayni paytda “Aristokratlar” jamoasi aʼzosi. U boshlovchi sifatida ham o‘z muxlislariga ega.
Abdurahmon Mavlonov
“Dizayn” kulgi jamoasi aʼzosi Abdurahmon Mavlonovning egizak farzandlari 2017-yil 18-iyun kuni tug‘ilgan. Instagram sahifasi orqali qo‘shaloq o‘g‘illi bo‘lganini maʼlum qilgan aktyor nafaqat Hasan va Husanni, balki oilaviy suratlarini ham ijtimoiy tarmoqlarga joylamaydi.
Ulug‘bek Xoliqov
Xonanda Ulug‘bek Xoliqovning egizak farzandlari 2021-yilning may oyida tug‘ilgan. Bir o‘g‘il va bir qiz egizaklarga qo‘shiqchining yaqinlari Maryam va Muhammadamin deb ism qo‘ygan.
Malika Avazova
O‘zbekiston davlat drama teatri aktrisasi Malika Avazova ham egizak farzandlarning onasi.
— Allohimdan bitta farzand so‘ragandik, ikkita farzand bilan siyladi. Turmush o‘rtog‘im bilan birga to‘rt yil davomida farzandli bo‘lishni kutdik. O‘zbekchilikda har xil gap-so‘zlar bo‘ladi, ularni yengishimda turmush o‘rtog‘imning katta daldasi bo‘ldi. Qaynotam rahmatlining ismi Hasan bo‘lgan, ular ham egizak bo‘lishgan ekan. Takror bo‘lmasin, bobosining ismini o‘g‘illarimizga qo‘ymaylik, deb boshqa ism qo‘yishga qaror qildik. O‘g‘illarimizga Muhammadali va Muhammadamin deb ism qo‘ydik, degan edi Malika Avazova intervyularidan birida.
Umida Norboyeva
“Iskanja” va “Dengiz guli” seriallaridagi ishtiroki bilan tomoshabinlarga yaxshi tanish bo‘lgan aktrisa Umida Norboyeva 12 yil deganda onalik baxtiga sazovor bo‘lgan.
— Kimdir befarzand ekanligimni biladi, kimlardir yo‘q. Ammo men homilador bo‘lishni 12 yil kutdim. “Qachon homilador bo‘lar ekanman? Bu baxt menga nasib etadimi?” deb ko‘p o‘ylardim. Shukrki, 12 yilda bo‘lsa-da, bu baxt nasib etdi. Egizak qiz farzandli bo‘ldim, deydi aktrisa Umida Norboyeva.
Izoh (0)