Toshkentda yaroqlilik muddati o‘tgan ichimliklar sotuvga chiqarishga tayyorlab qo‘yilgani aniqlandi (video)

Toshkent shahrida yaroqlilik muddati o‘tgan katta miqdordagi spirtli va salqin ichimliklar saqlab kelingani aniqlandi.

Iste’molchilar huquqlarini himoya qilish va sifati kafolatlanmagan mahsulotlarning savdoga chiqarilishining oldini olish maqsadida DXX xodimlari tomonidan Iqtisodiy jinoyatlarga qarshi kurashish departamenti hamda Alkogol va tamaki bozorini tartibga solish inspeksiyasi vakillari bilan hamkorlikda tezkor tadbir o‘tkazilgan.

Xususan, Toshkent shahrida spirtli va salqin ichimliklar savdosi bilan shug‘ullanuvchi 2 ta xususiy korxonaning Yashnobod tumanida joylashgan omborida katta qismining yaroqlilik muddati o‘tgan, umumiy qiymati 429 million 629 ming so‘mlik 79 172 dona salqin ichimliklar hamda 134 million 845 ming so‘mlik 3 374 dona spirtli ichimliklar saqlanayotgani aniqlangan.

Shuningdek, omborda kirim hujjatlariga ega bo‘lmagan, qiymati 1 milliard 187 million so‘mlik, mahalliy va xorijdan keltirilgan 25 746 dona turli xil spirtli ichimliklar mavjudligi ham aniqlangan.

Tekshiruv davomida salqin ichimliklarning asosiy qismining yaroqlilik muddati maxsus suyuqlik yordamida o‘zgartirilib, sotuvga chiqarish uchun tayyorlab qo‘yilgani ma’lum bo‘ldi.

Ayni paytda yaroqlilik muddati o‘tgan va kirim hujjatlariga ega bo‘lmagan ichimliklar sifatini tekshirish yuzasidan ekspertiza tayinlangan. Tergovga qadar tekshiruv tadbirlari amalga oshirilmoqda.