Rossiya prezidenti Vladimir Putin Kursk viloyatiga kelib, frontdagi vaziyat bilan tanishdi. Bu Ukraina kuchlari 2024-yilning 14-avgust kuni mazkur yo‘nalishda hujumga o‘tganidan beri ilk tashrifdir.
Kreml tomonidan e’lon qilingan kadrlarda uning Kursk viloyatidagi qo‘mondonlik markaziga harbiy formada kelgani, u yerda Putinni Rossiya qurolli kuchlari Bosh shtabi rahbari Valeriy Gerasimov kutib olgani aks etadi.
Bizning birlamchi vazifamiz — Kursk viloyatiga o‘rnashib olgan va hanuz himoyada turgan dushmanni butunlay tor-mor etish va hududni to‘liq ozod qilishdir, dedi Putin Rossiya harbiy rahbariyatiga murojaat qilib.
Shu bilan birga, Rossiya prezidenti Kursk hududida qo‘lga olingan ukrainalik askarlarni “terrorchilar” sifatida ko‘rish lozimligini ta’kidladi.
Kursk viloyatida tinch aholi va harbiy kuchlarimizga qarshi jinoyatlar sodir etayotgan kishilar — shubhasiz, terrorchilardir. Biz ularni aynan shunday baholashimiz kerak, dedi Putin.
U, shuningdek, Xalqaro Jeneva konvensiyasi me’yorlari Ukraina tomonida jang qilgan xorijlik jangchilarga nisbatan tatbiq etilmasligini aytdi.
Kurskdagi vaziyat
Rossiya qurolli kuchlari Bosh shtabi rahbari Putinga hisobot berib, Kursk viloyatida jang qilayotgan Ukraina qo‘shinlari qurshovga olinganini aytdi.
Ularni tizimli ravishda yo‘q qilish davom etmoqda, dedi Gerasimov.
Putin rus qo‘mondonlariga Ukraina qo‘shinlarini Kursk viloyatidan imkon qadar tezroq chiqarib yuborishni buyurdi.
Rossiya rahbari, shuningdek, Ukrainaning Kursk viloyati bilan chegaradosh Sumi viloyatida bufer zona yaratish varianti ko‘rib chiqilayotganini ma'lum qildi. Uning so‘zlariga ko‘ra, mazkur tashabbus Ukraina kuchlarining ehtimoliy hujumlaridan “sug‘urtalanish”ga yordam beradi.
Gerasimovning aytishicha, Rossiya armiyasi Kursk yo‘nalishida Ukraina nazoratida bo‘lgan hududlarning 86 foizini qaytarib olgan. Bu esa taxminan 1 100 kvadrat kilometr maydonni tashkil qiladi.
Bosh shtab rahbarining da'vo qilishicha, Ukraina tomoni Kursk viloyatini Rossiya bilan kelgusidagi muzokaralarda ayirboshlash uchun “karta” sifatida foydalanmoqchi bo‘lgan, biroq bu reja ish bermagan.
Bundan tashqari, u “Kursk operatsiyasi”dan ko‘zlangan yana bir maqsad — “Rossiya qo‘mondonligini Donbass frontidan kuchlarini olib chiqishga majburlash” ham amalga oshmaganini ta'kidladi.
Qarshi tomon nima deydi?
Putinning Kursk viloyatiga tashrifi bilan bir vaqtda Ukraina qurolli kuchlari bosh qo‘mondoni yo‘qotishlarni kamaytirish uchun chekinish buyruq berishi mumkinligiga shama qildi.
Eng og‘ir vaziyatda mening ustuvor vazifam ukrainalik askarlarning hayotini saqlab qolish bo‘lgan va shunday bo‘lib qoladi. Shu maqsadda mudofaa kuchlari bo‘linmalari, agar kerak bo‘lsa, qulayroq pozitsiyalarga manyovr qilishadi, deb yozdi Aleksandr Sirskiy.
Ukraina prezidenti esa Kiyev o‘z askarlari hayotini saqlan qolish uchun maksimal harakat qilayotganini ta'kidladi.
Ukraina tomoni mazkur yo‘nalishidagi vaziyatga rasman aniqlik kiritmagan bo‘lsa-da, Financial Times nashri Kiyev eng jangovar brigadalarni Kursk viloyatidan bosqichma-bosqich olib chiqayotgani haqida xabar berdi. DeepState loyihasi esa interaktiv xaritani yangilab, Sudja shahrini Ukraina armiyasi nazoratidan chiqarib tashladi.
Izoh (0)