Shuhrat Qurbonov “Milliy banklararo prosessing markazi” AJ (Humo) boshqaruvi raisi lavozimidan ketdi. Bu haqda Korporativ axborot yagona portali ma’lumotlaridan ma’lum bo‘ldi.
Unda keltirilishicha, Shuhrat Qurbonov 2025-yil 6-mart kuni o‘z arizasiga ko‘ra “Milliy banklararo prosessing markazi” AJ rahbarligidan ketdi. 7-mart kuni uning o‘rniga Aleksey Maksimov boshqaruv raisi lavozimiga tayinlandi. Aleksey Maksimov bungacha Octobank AJ boshqaruvi raisi o‘rinbosari lavozimida faoliyat yuritib kelayotgan edi.
“Milliy banklararo protsessing markazi” — Humo to‘lov tizimi 2018-yil sentyabr oyida prezident qarori bilan tashkil etilgandi. Shuhrat Qurbonov Humo to‘lov tizimiga bevosita tashkil etilganidan buyon rahbarlik qilib keldi. Humo saytida Shuhratbek Qurbonovning lavozimi “boshqaruv raisi vazifasini vaqtincha bajaruvchi” deb ko‘rsatilgan.
2025-yil yanvarida Paynet kompaniyasi Humo to‘lov tizimini sotib olgandi. “Milliy banklararo protsessing markazi”ning 100 foiz davlat aksiyalarini sotish bo‘yicha ochiq savdolar o‘tkazilganda oltita nomzod qatnashishga taklif qilingan. Ulardan 3 nafari belgilangan muddatlarda majburiyatga ega bo‘lgan takliflarni bildirgan. 65 million AQSH dollari miqdorida eng yuqori xarid bahosini taklif qilgan Paynet AJ kimoshdi savdosining g‘olibi deb topildi.
Humo’ning 100 foiz davlat ulushini sotish prezidentning 2024-yil 19-apreldagi qarorida ko‘zda tutilgan edi.
Izoh (0)