Ba’zi multfilmlar shunchalik chuqur mazmun va ko‘lamga egaki, ular ko‘plab badiiy filmlarni ortda qoldiradi. An’anaviy kino yoki seriallardan farqli o‘laroq, animatsiya janri hikoyalar yaratishda cheksiz imkoniyatlarni taqdim etadi. Yorqin ranglar, turli ko‘rinishdagi qahramonlar va xayoliy olam kabi tasvirlar tomoshabinga multfilmga yanada chuqurroq kirib borishiga yordam beradi. Bunday multfilmlar uyg‘otadigan chuqur hissiy kechinmalar klassik kinodan qolishmaydi va hatto ulardan o‘zib ketadi.
Shuning uchun “Oskar” mukofoti animatsiya janrida ham beriladi va tomoshabin uchun deyarli tanish bo‘lmagan ba’zi loyihalar yuksak e’tirof etiladi. Masalan, joriy yilgi marosimda “Oqim” multfilmi “Boshqotirma” ni ortda qoldirib, “Oskar”ga sazovor bo‘ldi. Quyida kutilmaganda nufuzli mukofot sovrindori bo‘lgan 6 ta animatsion loyihalarni to‘pladik.
“Shrek” (8,2)
Multfilm 2002-yildagi 74-Oskar mukofotlari marosimida “Eng yaxshi animatsion film” nominatsiyasida g‘olib bo‘ldi. Bu nominatsiya aynan o‘sha yili ilk bor ta’sis etilgan va “Shrek” tarixda birinchi bo‘lib ushbu mukofotni qo‘lga kiritgan. Multfilm “Maxluqlar korporatsiyasi” va “Jimmi Neytron: daho bola” kabi loyihalar bilan raqobatlashgan.
“Ruhlar olami” (8,5)
“Ruhlar olami” ota-onasini afsundan ozod qilish va ularni insonlar dunyosiga qaytarish uchun ruhlar olamiga kirib qolgan yosh qiz haqidagi fantastik animedir. U “Lilo va Stich” hamda “Muzlik davri” multfilmlari bilan “Oskar” uchun bellashgan.
“Uolles va Gromit: yovvoyi quyon lan’ati” (7,2)
Bu 2005-yilda chiqarilgan Britaniya animatsion filmi bo‘lib, Aardman Animations va DreamWorks Animation studiyalari tomonidan tayyorlangan. Filmdagi voqealar Uolles va uning sodiq iti Gromit atrofida bo‘lib o‘tadi. Ular sabzavot yetishtiruvchilarni quyonlardan himoya qilish bilan shug‘ullanadi, ammo tasodifan sirli quyon maxluqqa aylanadi va shaharchada tartibsizlik keltirib chiqaradi.
“Quvnoq oyoqchalar” (6,7)
Barcha g‘oliblar orasida eng past tomoshabin reytingiga ega “Oskar” mukofotiga sazovor bo‘lgan multfilm o‘z davrida “Chaqmoq Makvin” va “Mahluq uy” bilan raqobatlashgan.
“Rango” (7,2)
2011-yilda Gor Verbinski va Jonni Depp o‘rtasidagi hamkorlikda yaratilgan animatsion film. Syujetga ko‘ra, Rango — do‘kondagi xameleon bo‘ladi. U bir kuni cho‘l o‘rtasidagi katta yo‘lda mashinadagi yukxonadan tushib ketadi. Shundan so‘ng u o‘z hayotini saqlab qolishi uchun harakat qiladi. U yo‘lda Rango Gryaz shahrini uchratadi va ko‘plab sarguzashtlarga duch keladi.
“O‘rgimchak odam: yondosh olamlar” (8,2)
“Super oila” va “Itlar oroli” kabi loyihalar bilan “Oskar” uchun bellashgan mulftilm 2019-yilda Marvel komikslari asosida yaratilgan bo‘lib, Sony Pictures Animation tomonidan ishlab chiqarilgan. Mulftilmning o‘ziga xosligi shundaki, u 3D animatsiya va qo‘lda chizilgan komiks dizaynini uyg‘unlashtirgan.
Izoh (0)