Nyu Yorkdagi Tayms-skver markazida 16-martga o‘tar kechasi 45 yoshli erkakni yoqib yuborishdi. Bu haqda The Guardian xabar berdi.
Ma’lum qilinishicha, jabrlanuvchi kasalxonaga yotqizilgan. Uning ahvoli barqaror. Hozircha politsiya hodisa qasddan qilingan hujum yoki o‘z-o‘zidan sodir bo‘lgan tajovuz ekanini aniqlashtirmoqda. Voqea joyidan olingan kadrlarda politsiyachilar ko‘ylaksiz va qattiq kuygan erkakni tez yordam mashinasiga ortishayotganini ko‘rish mumkin.
Hujum qilgan shaxs voqea joyidan yashiringan va hozirda qidirilmoqda. Ekspert-kriminalistlar jabrlanuvchiga dastlab Patrón Tekila shishasidan tez alangalanuvchi suyuqlik sepilganini, so‘ngra unga o‘t qo‘yilganini aniqladi. Huquq-tartibot idoralari xodimlari maydonda o‘rnatilgan kuzatuv kameralaridagi yozuvlarni o‘rganmoqda.
- 16-mart kuni odamni yoqib yuborish bilan bog‘liq holat Germaniyada ham kuzatilgan edi. Hodisa tramvayda yuz bergan, ayolga o‘t qo‘ygan erkak qochib ketgan.
- 2024-yilda shunga o‘xshash holat Nyu York metrosida yuz bergan edi. O‘shanda noma’lum erkak ayolni yoqib yuborgan, jabrlanuvchi halok bo‘lgan. Politsiya gumonlanuvchi haqidagi ma’lumot uchun 10 ming dollar miqdorida mukofot e’lon qildi. Erkakni qo‘lga olishda politsiyaga qo‘ng‘iroq qilib, uni poyezdlarning birida ko‘rganlarini aytgan maktab o‘quvchilari yordam berdi.
- Bundan tashqari yanvar oyida Misrda o‘quvchilar o‘qituvchi ayolni yoqib yuborgan edi. O‘qituvchi o‘quvchilar tabrigidan so‘ng, kuyish jarohatlari bilan kasalxonaga yotqizilgan.
Izoh (0)