O‘zbekistonlik UFC jangchisi Ramazonbek Temirov qo‘shni davlat vakillari bilan oktagonga chiqishni istamasligini ma’lum qildi. Bu haqida “Sports24.kz” nashri xabar bermoqda.
Bu men uchun noqulay bo‘lar edi. Biz qo‘shni davlatmiz, do‘stona aloqalarimiz bor, shu sababli jang qilishni xohlamayman. Bizning divizionda boshqa mamlakatlardan ham ko‘plab jangchilar bor. Bu haqda UFC rahbariyatiga ham, intervyularimda ham aytganman. Bugun yana takrorlayman. Men ushbu diviziondagi qozoq jangchilari Azat Maksum va Asu Almabayev bilan jang qilishni istamayman, dedi Temirov.
Ramazonbek Temirov 2024-yilda UFC’dagi debyut jangini o‘tkazdi. Ushbu bosqich uning faoliyatidagi muhim qadam bo‘ldi, chunki UFC dunyoning eng nufuzli aralash jang san’ati (MMA) ligalaridan biri hisoblanadi. UFC’ga kelishidan oldin sportchi Qozog‘istonning Octagon va Naiza ligalarida jang o‘tkazgan.
2-mart kuni o‘zbekistonlik sportchi amerikalik Charlz Jonsonga qarshi kardga chiqib, ochkolar bo‘yicha g‘alaba qozondi. Hozirda 28 yoshli jangchining hisobida 19 ta g‘alaba va 3 ta mag‘lubiyat mavjud. UFC’da esa 2 ta jang o‘tkazgan va har ikkisida ham g‘olib bo‘lgan.
Ma’lumot uchun, Ramazonbek Temirov eng yengil vazn toifasidagi yangilangan UFC reytingida 13-pog‘onadan joy oldi. Bungacha u 16-o‘rinda edi.
Izoh (0)