Futbol bo‘yicha Ispaniya chempionatining 27-turi doirasidagi “Barselona” – “Osasuna” o‘yini kecha, 8-mart kuni bo‘lib o‘tishi kerak edi. Ushbu o‘yin boshqa kunga qoldirildi.
Kataloniya klubi tibbiy bo‘limi xodimi, jamoa shifokorlaridan biri Karles Minyarro Garsiyaning uchrashuv oldidan vafot etgani sababli bahs o‘tkazilmaydigan bo‘ldi. Klub xabarni rasman tasdiqladi.
Cadena SER xabariga ko‘ra, futbolchilar o‘yinni ko‘chirishni o‘zlari so‘ragan. Shifokor uchrashuv oldidan jamoa bilan bitta mehmonxonada bo‘lgan. O‘lim sabablari hozircha maʼlum emas. U mehmonxonadan o‘lik holda topilgan.
40 yoshli Karles Minyarro 2017-yildan buyon klub tizimida ishlab kelayotgandi. Joriy mavsumda u futzal jamoasidan futbol jamoasiga o‘tkazilgan edi.
“Barselona” futbol klubi chuqur qayg‘u bilan bugun kechqurun asosiy jamoa shifokori Karles Minyarro Garsiyaning vafot etganini ma’lum qiladi. Shu sababli “Osasuna” bilan o‘yin boshqa muddatga ko‘chirildi.
“Barsa” direktorlar kengashi va barcha xodimlari ushbu og‘ir damda uning oilasi va do‘stlariga samimiy hamdardlik bildiramiz”, deyiladi klub bayonotida.
“Real” jamoasi va klub prezidenti ham “Barselona” shifokori vafotidan chuqur qayg‘uda ekanini bildirgan.
Izoh (0)