Gollivudning yirik filmlarini ishlab chiqarish doim katta xarajatlarni talab qiladi, ayniqsa, loyiha blokbaster va fantastika janrida bo‘lsa, kino byudjeti yanada oshadi. Aktyorlarga beriladigan gonorar, maxsus effektlar, turli mamlakatlarda suratga olish va ishlab chiqarish kabi ishlar uchun millionlab pullar sarflanadi.
Bunday loyihalar orasida o‘zining yuqori byudjeti bilan ajralib turadigan film bu “Karib dengizi qaroqchilari: noma’lum sohillarda” loyihasidir. Franshizaning to‘rtinchi qismi 2011-yilda namoyish etilgan.
Film syujeti
Kapitan Jek Chittak abadiy yoshlik bulog‘i haqida mish-mishlarni eshitib, uni izlab topishga qaror qiladi. Ushbu yo‘lda u o‘zining sobiq sevgilisi Anjelika bilan uchrashadi. Anjelika yovuz qaroqchi Qora Soqolning qizi bo‘lib chiqadi. Jek bu sarguzasht davomida Ispaniya va Buyuk Britaniya flotlari bilan ham jang qilishiga to‘g‘ri keladi. Ushbu film oldingi qismlardan farqli ravishda turli sehrga boy voqealarga to‘la bo‘lib, syujetning markazida abadiy hayot bulog‘i turadi.
Filmning qimmatga tushish sabablari
Aktyorlarning katta gonorari: Birgina Jonni Deppning gonorari 56 million dollarni tashkil qilgan.
Yo‘l xarajatlari: Filmni suratga olish ishlari turli mamlakatlarda olib borilgan. Jumladan, Gavayi orollari, Karib dengizi sohillari, LosAnjeles, Puerto Riko, London va hatto odamlar yashamaydigan Palominito orolida ham ishlangan.
Maxsus effektlar: Film 3D formatida ishlangan bo‘lib, ko‘plab vizual effektlar uchun katta mablag‘ sarflangan va o‘nlab studiyalar maxsus effektlar ustida ishlagan.
Filmning kassa daromadi 1,045 milliard dollarni tashkil etgan.
Izoh (0)