“Mo‘jizalar maydoni” ko‘rsatuvi Leonid Yakubovichni sevimli teleboshlovchiga aylantirdi. Teleyulduzning yagona o‘g‘li esa omma e’tiboridan o‘zini chetga olishga qaror qilganga o‘xshaydi.
Leonid Yakubovich uch marta oila qurgan. Birinchi nikohiga oid ma’lumotlar kam, faqat xotinining ismi Raisa ekanligi ma’lum. Ikkinchi rafiqasi Galina Antonova esa ekskursiya rahbari bo‘lgan. O‘sha paytda Yakubovich hali mashhur emasdi — u oddiy komsomol a’zosi sifatida zavodda ishlardi. Shu nikohdan 1973-yilda teleboshlovchining yagona o‘g‘li Artyom tug‘ilgan.
Uning tug‘ilish tarixi haqiqiy trillerni eslatadi: Galinaning tug‘uruq dardi kechasi boshlangan, hayajonlangan bo‘lajak ota tez yordamga bog‘lana olmay, qo‘shni militsiya bo‘limiga chopib borgan. Tug‘uruqxonada chaqaloq shamollab qolgan — u 2 oy davomida o‘pka yallig‘lanishidan davolangan.
Yakubovichning ijodiy faoliyatidagi dastlabki qadamlari Artyomning bolalik yillariga to‘g‘ri keladi. 1979-yildan boshlab bo‘lajak teleboshlovchi adabiy faoliyat bilan shug‘ullana boshladi — ssenariylar va hajviy monologlar yozishga kirishadi.
Keyinchalik boshlovchi o‘g‘liga yetarlicha e’tibor bermaganini tan oladi. “O‘g‘limni e’tibordan chetda qoldirdim”, xafa bo‘lib tan oladi Yakubovich.
Ota-o‘g‘il munosabatlari Yakubovichning Galina bilan ajrashishiga ta’sir ko‘rsatadi. Munosabatlar allaqachon boshi berk ko‘chaga kirib qolgan bo‘lsa-da, er-xotin hali ham o‘zlariga imkoniyat berishni istardi — shu sababli ular vaqtincha alohida yashashga qaror qilishadi. Biroq aynan shu paytda teleboshlovchi o‘zidan 18 yosh kichik Marina Vido bilan sevishib qoladi. Oqibatda Yakubovich oilasini tashlab ketadi. O‘g‘li anchagacha otasidan xafa bo‘lib yuradi — uni yangi xotinidan qizg‘anardi.
Teleboshlovchining yangi oilasida tez orada Varvara ismli qizi dunyoga keladi.
Artyom otasi kim ekanini bilishlarini istamagani uchun ham onasining familiyasini olgan. Bu familiyani u qizi Sofiyaga ham bergan. Sofiya hozircha Yakubovichning yagona nabirasi bo‘lib, 2000-yilda tug‘ilgan. Aytgancha, mustaqillikka bo‘lgan ishtiyoqni u otasidan meros qilib olgan.
Sofiya shuhratga intilmaydi, hatto mashhur va badavlat bobosining yordamini ham olmaydi. Talabalik paytida u umumiy ovqatlanish sohаsida ishlagan.
“Sonya ishlaydi, o‘zi pul topishni xohlaydi. Mendan pul olmaydi. Haydovchilik kurslariga qatnayapti”, deb aytgandi Leonid Yakubovich 2022-yilda.
Artyom yillar o‘tib, otasini kechirdi — yoshi ulg‘aygan sari u Yakubovich bilan yaqinlasha boshladi. Ota-bola tez-tez uchrashib turadi, bilyard o‘ynashadi, baliq oviga borishadi. Bundan tashqari, ular hozirda hamkasb ham — Artyom “Birinchi kanal”da Axborot dasturlari boshqarmasida ishlaydi.
Izoh (0)