“Fuqarolar bilan mehnat shartnomalarini rasmiylashtirmagan ish beruvchilarga nisbatan qonunchilikda belgilangan javobgarlik choralarini yanada kuchaytirishga qaratilgan O‘zbekiston Respublikasining Ma’muriy javobgarlik to‘g‘risidagi kodeksiga o‘zgartish va qo‘shimcha kiritish haqida”gi qonun loyihasi jamoatchilik muhokamasi uchun e’lon qilindi.
Loyihada norasmiy ravishda mehnat shartnomasi tuzmasdan fuqarolarni ishga jalb qilish holatlarini kamaytirish hamda mehnat huquqlari va mehnatni muhofaza qilish to‘g‘risidagi qonunchilikni buzilishini oldini olish maqsadida Ma’muriy javobgarlik to‘g‘risidagi kodeksga o‘zgartish va qo‘shimchalar kiritish taklif qilinmoqda.
Jumladan, qonun loyihasi bilan Ma’muriy javobgarlik to‘g‘risidagi kodeks fuqarolarni qonunchilikda belgilangan tartibda mehnat shartnomasi tuzmasdan mehnatga jalb qilganlik uchun javobgarlikni nazarda tutuvchi 49-5-modda bilan to‘ldirilmoqda.
Unda fuqarolar bilan mehnat shartnomasini qonunchilikda belgilangan tartibda rasmiylashtirmaslik yoxud mehnat shartnomasi tuzmasdan ishga jalb qilish fuqarolarga bazaviy hisoblash miqdorining o‘n baravari miqdorida, mansabdor shaxslarga esa — o‘ttiz baravari miqdorida jarima solinishiga sabab bo‘lishi belgilanmoqda.
Xuddi shunday huquqbuzarlik mansabdor shaxs tomonidan ma’muriy jazo chorasi qo‘llanilganidan keyin bir yil davomida takror sodir etilgan bo‘lsa, bazaviy hisoblash miqdorining ikki yuz baravari miqdorida jarima solishga sabab bo‘lishi belgilanmoqda.
Taklif va mulohazalar 19-martgacha qabul qilinadi.
Izoh (0)