UEFA “Roma” bosh murabbiyi Klaudio Ranyerini hakamlarni tanqid qilgani uchun jarimaga tortdi. Bu haqda Football Italia nashri xabar berdi.
Jarima Yevropa Ligasi pley-off bosqichining “Portu”ga qarshi dastlabki uchrashuvidan (1:1) keyin qo‘llangan. Uchrashuvni nemis hakami Tobiash Shtiler boshqargan edi.
Ranyeri mazkur bahsdan so‘ng Shtiler raqib jamoaga g‘alabani “sovg‘a qilishi” mumkin ekani borasida gapirgan. Shuningdek UEFA hakamlar qo‘mitasi rahbari Roberto Rozettini ham tanqid qilib, 2023-yilgi Yevropa Ligasi finaliga ingliz hakami Entoni Teylorni tayinlash to‘g‘ri qaror bo‘lmaganini aytib o‘tgan. O‘sha finalda “Roma” “Sevilya”ga penaltilar seriyasida yutqazgandi (1:1, penaltilar – 1:4).
Natijada UEFA Ranyerini 20 ming yevroga jarimaga tortdi. Bundan tashqari, “Roma” klubi jamoa a’zolarining “noo‘rin harakatlari” uchun yana 11 ming yevro jarima to‘laydigan bo‘ldi.
Izoh (0)